Duha ka centenarians gihataga’g tag P100,000

CEBU, Philippines — Duha ka centenarians gikan sa lain-laing lungsod sa amihanang Sugbo ang nakadawat og P100,000 matag usa gikan sa Kagamhanang Probinsyal sa Sugbo.

Si Gobernador Gwendolyn Garcia mismo ang mitunol sa tseke ngadto sa duha ka centenarians gikan sa lungsod sa Compostela ug Liloan niadtong Biyernes, Pebrero 21, atol sa Caravan of Government Services nga gipahigayon sa lungsod sa Catmon.

Si Andrea Tarroja gikan sa Compostela ug si Luciano Yuson Wagas gikan sa Liloan ang nakadawat sa maong pinansyal nga ayuda gikan sa Kapitolyo isip pasalamat sa ilang taas nga pagpangalagad ug kontribusyon sa ilang mga komunidad.   Si Tarroja natawo niadtong Disyembre 7, 1924, samtang si Wagas natawo niadtong Enero 7, 1924, sumala sa Sugbo News.

Gipahibalo usab nga ang sekreto sa ilang taas nga kinabuhi mao ang pagpabiling himsog pinaagi sa pagkaon og mga masustansya’ng pagkaon ug paglikay sa stress.

Gawas sa pinansyal nga insentibo, nakadawat usab ang mga centenarians og adult wheelchairs ug ABAG Sugbo QR-coded cards, nga naghatag kanila og libreng medikal nga konsultasyon ug tambal sa 16 ka ospital nga gipadagan sa Kapitolyo.

Ang ilang mga guardians nakadawat usab og mga sertipiko sa pagmatuod alang sa Sugbo Kahanas, nga nagsiguro sa ilang pwesto sa programa sa Kapitolyo alang sa teknikal ug bokasyonal nga training diin sila pwede maka-avail. Dugang pa, ang Department of Social Welfare and Development (DSWD)-7 naghatag og hinabang pinaagi sa food packs ug dugang nga P2,000 cash matag usa, samtang ang Department of the Interior and Local Government (DILG)-7 mitunol og tsinelas ug lima ka kilo nga bugas alang sa mga centenarians.

Tungod kay ang Caravan of Services niadtong Biyernes para sa Kinto Distrito, si Representative ug Deputy Speaker Vince Franco “Duke” Frasco usab mitunol og 10 kilos nga bugas alang sa mga centenarians.

Si Garcia kauban usab ang Provincial Board Members sa Kinto Distrito nga sila si Mike Villamor ug Red Duterte, uban ni Second District Board Member Stanley Caminero ug Sixth District Board Member Glenn Anthony Soco.

Mitambong usab ang mga mayor sa Kinto Distrito, lakip na sila si Catmon Mayor Avis Monleon, Borbon Mayor Noel Dotillos, Carmen Mayor Carlo Villamor, Sogod Mayor Lissa Marie “Moonyeen” Streegan, ug Compostela Mayor Felijur Quiño. (BANAT NEWS)