70-anyos nagselos, asawa gitigbas

CEBU, Philippines — Tungod lang sa komedya nga gidibdib, kritikal ang 65-anyos nga ginang  human siya gitigbas ug gipusil pa gyud sa iyahang 70-anyos nga bana gumikan sa selos diha sa Sitio Lower Bagdok, Barangay Sagay, Dakbayan sa Toledo niadtong Miyerkules sa gabii, Pebrero 19, 2025.

Ang biktima nakaangkon og samad pinusilan sa tiyan ug tinigbasan sa ulo, buko-buko ug mga tiil niini. Ang bana niini nga suspek nabalhog na sa prisuhan sa Toledo City Police Station tungod sa iyang gibuhat.

Matud pa nangabubho kini kay niadto pang Nobiyembre sa niaging tuig atol sa iyang birthday wala na niuli sa ilaha ang asawa hangtud nga nag Pebrero nalang ning tuiga wala gyud kini niuli.

Giangkon sa suspetsado nga nakasab-an niya kini kay nagduda siyang adunay laing karelasyon, pirme sab siyang sultihan nga wala na kini mahigugma niya ug dili na sab magpa kiss ug makighilawas kaniya.

Matud pa sa kapolisan nga dihay usa ka higayon nga gikomedyahan ang suspek sa kainom nga “nakatilaw og bolitas” ang iyang asawa mao nga gibiyaan siya niini hinungdan nga nisamot iyang pagduda ug pangabubho.

Miyerkules sa gabii, Pebrero 19, nasuta sa suspek nga nauli ang biktima sa panimalay sa igsuon niini diha sa Barangay Sagay, Toledo City.  Giadto niya kini aron mangayo og pasaylo ug papaulion na sa ilaha, apan wala mosugot ang biktima ug dinhi na nahitabo ang lalis sa duha.  Niuli ang suspetsado ug nikuha og kalibre .38 revolver ingon man pinuti ug gibalikan ang asawa ug pagkahuman gitigbas ug gipusil kini ug misibat, apan naabtan sa Pinamungjan ug nakuha sab ang armas ug pinuti nga gigamit sa krimen. Sa imbestigasyon sa kapolisan gikan sa pamilya sa biktima, nasuta nga dili tinuod ang mga pasangil sa suspek sa asawa nga duna kini laing karelasyon, ilabi na nga napulo na ka buok ilang anak.

Gikomedyahan lang matod pa ang suspetsado nga aduna nay lain na ang iyahang asawa, apan iyaha kining gidibdib.

Kasong frustrated parricide in relation to Republic Act 9262 ang ipasaka batok sa suspetsado. IBM  BANAT NEWS