Asawa, kabit nasakpan sa bana

CEBU, Philippines — Gibalhog sa prisuhan ang usa ka asawa ug ang giingong kabit niini human gipadakop sa bana kay nasakpan sila nga ni check-in ug nagdulog sa usa ka motel diha sa C. Padilla Street, Barangay Mambaling, siyudad sa Sugbo kagahapon sa alas 5 sa hapon, Huwebes, Pebrero 20, 2025.

Ang reklamante 35-anyos nga bana nga nagpuyo sa Talisay City.

Samtang ang gipadakop niya nga asawa nag-edad og 37-anyos, molopyo gihapon sa  Talisay City ug ang giingong kabit niini kay 39-anyos, lumad nga taga Tubigon, Bohol apan kasamtangan nga nagpuyo sa Tungkoo, Lungsod sa Minglanilla.

Sa impormasyon sa Mambaling Police Station 11 Cebu City Police Office ang bana nidangop sa ilaha ug nangayo og tabang tungod kay iyahang asawa ug ang giingong kabit niini nasakpan niya nga nisulod og motel diha sa C. Padilla Street, Barangay Mambaling.

Niresponde ang kapulisan ug niadto sa maong motel ug didto naaktuhan sa bana ang duha nga nagdulog sulod sa kwarto.

Hinungdan nga gidakop ang mga suspetsado ug gibalhog sa prisuhan. Gikatakda sila nga pasakaan og kasong adultery.—IBM BANAT NEWS