CBRT road separator gibasol sa aksidente

CEBU, Philippines — Tungod sa mga report nga dunay mga nadisgrasya sa bag-ong gitaud nga luminous separators sa Cebu Bus Rapid Transit (CBRT) sa Osmeña Boulevard, ang Cebu City Traffic Office misalikway sa pangangkon aksidente ang nahitabo kondili tinuyoan kini sa motorista.

Wala pay usa ka adlaw gikan sa pagbutang sa maong removable barriers sa usa ka bahin sa Phase 1 sa CBRT diha Osmeña Boulevard, duna nay mga report nga naay mga nagmotor nga nangatumba tungod niini diha sa social media.

Duna say mga CCTV footage nga gipang post sa social ug ang gibasol sa hitabo mao ang maong separators.

Apan si Atty. Kent Jongoy, Assistant Head sa CCTO, miklaro nga usa ra gyud ka insidente ang natala sa kapolisan tungod niini.

Matud pa niya kompleto og road markings ug signage ang maong dalan ug kining separators usa kini ka traffic control devices.

“It is not an accident; It is definitely deliberate and a natural consequence of driving attitude and maneuver. Mao na siya, wa gyuy ingon nga aksidente,” matud pang Jongoy.

 Hinuon nakasabot siya nga gipasangil kining mga hitabo sa maong mga separators kay bag-o pa man kini gibutang.  Siya nidugang nga kadaghanan sa mga tawo wala kasabot sa gamit niini.

Tungod kay ang CBRT usa ka nationally funded project,  responsibilidad sa  Department of Transportation (DOTr) isip maoy implementing agency nga mopahibalo bahin niini sa publiko.

Gipasabot sab ni Jongoy  nga ubos sa Traffic Code, ang "solid lane"  nagsilbing  giya sa mga motorista ug dili dapat mogawas aron mobalhin og laing lane.

Kadtong naaksidente, nisulod kini sa “junction box” ug mipapidpid og maayo sa wala nga dili gyud unta buhaton.

Matud niya tungod aning mga giingong naaksidente, magbutang sila og dugang traffic enforcers.

Apan ilahang pahugtan ang implimentasyon sa traffic laws sa lugar kay dili nila buot anaron ang mga “kamote drivers” nga ang pasanginlan sa nahitabo kanila mao ang mga traffic devices nga gituyo og butang aron subayon sa mga drayber aron di sila madisgrasya.

Sa pikas bahin, sa habig sa CBRT Management, ang Project Manager Norvin Imbong miingon nga magbutang na sila og bollards inay nga mga separators lang ang ibutang aron mas dali nga makita sa mga motorista.  (BANAT NEWS)