Giposasan kay nagselos

CEBU, Philippines — Usa ka lalaki ang gidakop sa kapolisan human niini gidagit ug giposasan ang mga kamot ug tiil sa iyahang higalang babaye gumikan sa selos niadtong Domingo sa gabii, Pebrero 9, 2025.

Ang pag-rescue sa biktima nakuhaan og video ug nag-viral karon sa social media nga nag-ingong gidagit ang dalaga.

Apan nihatag og katin-awan ang hepe sa Guadalupe Police Station 9 Cebu City Police Office nga si Police Major Miles Damoslog nga dili kini kaso sa abduction. 

Nagdumili sab siya pagpabutyag sa pangalan sa mga nalambigit sa kaso subay sa hangyo sa pamilya sa dalaga.

Nagkanayon si Damoslog nga managhigala ang suspek ug ang biktima. Matud pa gikan sa dalan Escario ang duha kauban ang lain nilang higala kay nagduwa og board games.

Gihatod matud pa sa suspek ug sa biktima ang ilang amiga diha sa Banawa.

Apan human nahatud ang amiga, gikatahong kalit nga giposasan ang suspek ang kamot ug tiil sa biktima ug gatuyok-tuyok ra sila sa Cebu City hangtod nakaabot sa Mandaue City sakay sa awto sa suspek.

Wala na mosulti ang biktima kun asa dapita sila nag-stopover nga diin ang suspek nanaog kay nipalit og tubig.

Tungod sa kahadlok sa biktima dalidali kining nitawag sa iyang maguwang samtang wala ang suspek aron mangayo og tabang.

Ang maguwang daling mi-trace sa cellphone sa manghod pinaagi sa Google map ug nakita nila nga naa kini sa Mandaue City maong didto sila sa Police Station 2 sa Mandaue City Police Office nangayo og tabang.

Samtang gisundan ang cellphone naabot sila sa Cardinal Rosales Avenue, Barangay Mabolo ug didto na sila naabtan sa kapulisan ug gi-turnover sa Guadalupe Police Station 9.

Ang rason matod pa nganong nahimo kadto sa suspek kay giingong nagselos kini kay nganong mas suod ang biktima ug kadtong ilang amiga nga ilang gihatud nga unta mas una silang nagkaila.

"Parang nag tantrum ba ‘yung suspect na bakit ganito daw, parang mas close pa yung biktima sa isang kaibigan nila na mas nauna man sila nagkakilala daw parang ganun," sigon ni Damoslog.

Managhigala ra matud pa ang biktima ug suspek ug wala'y relasyon.

Desidido matod pa mopasaka og kasong illegal detention ang biktima batok sa suspetsado.

Si Damoslog niawhag sa katawhan nga mag-amping kanunay. (BANAT NEWS)