Pipila ka lugar gipanid-an sa Comelec

CEBU, Philippines — Pipila ka dapit sa Sugbo ang gipanid-an sa Commission on Election (Comelec) gumikan sa intense political rivalry.

Apan gitataw sa Comelec nga hapsay ug malinawon sa pagkakaron ang Cebu.

Matud sa Comelec nga walay dapit sa Central Visayas nga nabutang sa areas of concern diin malinawon ang sitwasyon sa pagkakaron hinuon adunay pipila ka mga dapit sa Sugbo ang gipanid-an tungod sa intense political rivalry.

Si Atty. Francisco Pobe, director sa Comelec-7 nagkanayon nga ang ilang dapit nga gitutokan karon mao ang Cebu City, Mandaue City, 2nd district ug 4th district sa Probinsiya sa Sugbo.

Gibutyag ni Pobe nga ilahang gipadayon ang hugot nga pagtutok sa maong mga dapit aron magpabilin ang kalinaw niini bisan taliwala sa political intense rivalry ug dili usab kini makahatag ug kahadlok ngadto sa katawhan.

Gisiguro nila gikan sa day one hangtud sa adlaw sa eleksiyon ang seguridad sa katawhan nga luwas kining mopahigayon sa ilang katungod sa pagbotar.

Si Pobe nagkanayon nga nagpadayon pa usab sila karon uban sa kapolisan sa assessment sa mga dapit nga sakop sa ilang area of jurisdiction.

Dugang ni Pobe nga sa pagkakaron on track sila sa ilang mga trabahuon diin padayon ang ilang pakig-alayon sa ilahang ulohan nga buhatan. (BANAT NEWS)