Pag-update sa feasibility study sa BRT project giuyonan

CEBU, Philippines — Uyon si Cebu City Mayor Raymond Garcia sa plano sa Department of Transportation (DOTr) nga i-update ang feasibility study sa Cebu Bus Rapid Transit (CBRT) project tungod kay dunay dagkong mga kausaban sa milabay nga dekada nga kinahanglang ikonsiderar sa pagpadayon og tukod niini.

Iyang gitumbok nga sukad sa katapusang feasibility study nga gihimo niadtong 2015, aduna nay dagkong kausaban sa traffic volume, gidaghanon sa mga tawo, ug mga establisamento sa siyudad.

"I agree totally with the updating of the feasibility study considering that the conditions before and now 10 years apart, I mean if you had 10,000 cars on the road in 2015 you might have already 20,000 cars on the road now so of course, the conditions have changed," matud ni Garcia.

Sumala ni Garcia, ang plano sa reassessment naggumikan sa mga kabalaka nga gipadayag sa mga local government units (LGUs), ilabi na ni Gobernador Gwen Garcia sa Probinsya sa Sugbo, bahin sa kahimtang sa feasibility niini.

Atol sa bag-o lang nga Regional Development Council (RDC) meeting nga gitambongan ni Presidente Ferdinand Marcos Jr., gawas sa mga programa ug proyekto sa Central Visayas nga gihisgutan, ang CBRT project maoy dunay halapad nga diskusyon diin nangutana ang presidente bahin sa status niini.

Sa maong tigom, gibutyag sa DOTr nga ang ahensya anaa na sa "process of updating their feasibility study" nga ilang iuyon sa kasamtangang kondisyon.

Sa laing bahin, giklaro ni Garcia nga wala mohatag og direktiba ang presidente nga paspasan ang CBRT project o i-review ang feasibility study, kondili nimando kini nga ipadayon ang pagpatuman sa proyekto ug himoon ang saktong koordinasyon tali sa mga ahensya ug LGUs ug isiguro nga mahatagan og pagtagad ang mga local concerns.

Subay niini, nihimo dayon og aksyon ang mayor pinaagi sa pag-facilitate sa right-of-way acquisitions nga gikinahanglan alang sa proyekto ug pinaagi sa pakig-alayon sa city councilors aron unahon ang paghatag kaniya og awtoridad nga makapirma sa nahibiling  deeds of sale sa mga apektadong property.

Bahin sa pag-update sa feasibility study, si Garcia nituo nga wala ray bisan unsang dagkong kausaban tungod sa tuyo sa presidente nga ipadayon ang proyekto ug nga dili ra kini makalangan sa pagpadayon sa konstruksyon sa CBRT project.

Samtang gibutyag ni Engr. Norvin Imbong, CBRT Project Manager nga ang Phase 1 anaa na sa 85 porsyento sa trabaho ug gipaabot nga mahuman kini sa buwan sa Marso.  Gipaabot nga sugdan na usab sa Hunyo ngadto sa Hulyo ang package 2 ug 3 apan mag-agad kini sa procurement process. Gipahibalo usab ni Imbong nga adunay pito nga nanag-iya ug luna nga maapektohan sa maong proyekto ang mabayran na human aduna nay pagtugot gikan sa Cebu City Council.

Ang mga maapektahan nagagikan sa F. Vestil Street nga dunay 52 ka panimalay, 3 sa Talamban ug 1 sa NRA.

Si Mayor Raymond Alvin Garcia nakigpinirmahay kagahapon sa upat ka mga nanag-iya sa luna gikan sa pito nga unang nahatagan ug pagtugot nga sila mabayran. (BANAT NEWS)