Mga miyembro sa CERNET mikondinar sa gobyerno

CEBU, Philippines — Gikondinar sa mga miyembro sa Community Empowerment Resource Network (CERNET) ang gobyerno nonot sa giingong pagtarget sa mga non-government organizations (NGOs) ug mga trabahante niini isip kabahin sa ilang paningkamot nga makagawas sa Financial Action Task Force (FATF) "grey list."

Ang CERNET, usa ka NGO nga kasamtangang nag-atubang sa mga alegasyon sa pagpondo sa terorismo, gitawag ang administrasyon nga naghimo himo og kabo batok kanila, ug mipahimangno nga kini nga mga lihok dili makatabang sa pagpalambo sa ekonomiya.

Ang FATF usa ka inter-governmental nga organisasyon nga nagmugna og mga internasyonal nga pamatasan aron batukan ang money laundering ug terrorists financing.

Niadtong Hunyo 2021, naapil ang Pilipinas sa FATF grey list, nga nagpasabot nga ang nasud anaa sa mas mahugot nga pag-monitor sa ilang mga paningkamot sa anti-money laundering (AML) ug counter-terrorism financing (CFT).

Matod sa CERNET-27, walay klarong basehan ang pag-freeze sa mga bank account sa NGOs ug ang pagpang-akusar batok kanila.

Dugang pa nila nga ang pagpugong sa operasyon sa mga organisasyong nga motabang  makadaot sa katungod sa mga tawo nga importante alang sa ekonomikanhong ug sosyal nga kalambuan.

Ang grupo giakusahan sa Department of Justice (DOJ) niadtong Mayo 2024, human sa reklamo nga gisang-at ni Brig. Gen. Joey Escanillas sa Task Group Cebu niadtong Mayo 2023.

Ang maong kaso, nga walay pyansa, gi-review sa Regional Trial Court (RTC) Branch 74 sa Cebu City, nga sa ulahi mipahamtang og piyansa nga P200,000 matag usa.

Niadtong Oktubre 2023, gipang-freeze sa Anti-Money Laundering Council (AMLC) ang mga bank account sa CERNET, hinungdan nga naparalisar ang ilang kapasidad sa pagtabang sa mga kabus nga komunidad.

Gibutyag nila nga dunay ubang NGO nga nakaagi sa susamang sitwasyon, hinungdan sa kabalaka nga posibleng adunay mas lapad nga kampanya batok sa mga organisasyong sibil sa nasud. Nagtuo usab ang CERNET-27 nga posibleng ang National Task Force to End Local Communist Armed Conflict (NTF-ELCAC) nagpaluyo sa maong mga lihok.

Gipadayag sa CERNET-27 nga walay sila’y bisan unsang koneksyon sa terorismo ug ang ilang misyon mao ang pagtabang sa mga mag-uuma, kababayen-an, kabataan, katigulangan, ug mga kabus nga lumulupyo sa Negros Oriental, Cebu, Bohol, Biliran, ug Leyte. (BANAT NEWS)