Managsuon patay human nakigpinusilay sa mga polis

CEBU, Philippines — Patay ang magsuon human kini nakigpinusilay sa kapolisan sa Dakbayan sa Talisay diha sa Sitio Cambawog, Barabgay Campo 4 kagahapon sa kadlawon.

Ang mga namatay mao sila si alyas “Jay-r”, 32-anyos ug alyas “Ike”,18-anyos parehong residente sa Sitio Mananga 2, Barangay Tabunok sa nahisgutang siyudad.

Si Police Lieutenant Colonel Epream Paguyod, hepe sa kapolisan sa Dakbayan sa Talisay nibutyag nga nakadawat sila og taho kabahin sa duha ka lalaki nga mga armado.

Ang kapolisan sakay sa usa ka unmarked vehicle daling niresponde sa maong taho ug giingong sa ilang pagkanaog gikan sa sakyanan gipamusil sila sa managsuon.

Sa maong pagpamusil sa mga suspetsado nalungag-lungag ang sakyanan sa kapolisan.

Nibawos ang mga polis og pusil ngadto sa mga suspetsado ug nangaigo kini.

Ang managsuon daling gidala sa mga polis ngadto sa tambalanan apan pareho kining nakabsan sa ilang kinabuhi.

Nakuha sa mga polis gikan sa posisyon sa magsuon ang usa ka KG-9, usa ka kalibre .45 nga pistola ug usa ka kalibre .38 nga revolver.

Ang magsuon nailhan sa mga polis pinaagi sa ilang rogues gallery.

Matud ni Paguyod nga ang maguwang maoy hitman nga adunay tulo ka kaso sa murder samtang upat ang frustrated murder ug naila kini nga top 4 most wanted sa rehiyon.

Samtang ang manghud nag-atubang og kasong homicide sa niaging tuig hinungdan nga gidala kini sa rehabilitasyon alang sa mga menor de edad nga adunay tulobagon sa balaod ug matud usab ni Paguyod nga ilang sutaon kong nakaikyas o nakagawas ba kini.

Nagduda si Paguyod nga adunay giatangan ang duha aron ilang tulison. (BANAT NEWS)