Utang sa CHAMP sa mga tambalanan bayaran

CEBU, Philippines — Giangkon sa pipila ka mga sakop sa Cebu City Council nga ang mga pasyente nga gi-endorso sa Cebu City Government pinaagi sa City Hospitalization and Medicines Program (CHAMP) gibalibaran sa pipila ka tambalanan tungod wala pa sila mabayri sa mga utang  sud na sa tulo ka tuig.

Aron matubag kini, giaprobahan sa konseho ang labing menos P2.4 milyones aron mabayran kini nga mga utang gikan sa 2020 ngadto sa 2023 atol sa pinakaulahing regular session.

Nalakip sa resolusyon nga gisang-at ni Konsehal Noel Wenceslao, Chairman sa Committee on Budget and Finance, ang usa ka certification sa availability of funds aron suportahan kini nga sugyot nga gi-isyu sa City Treasurer’s Office ug Office of the Budget and Finance.

Matud ni Wenceslao ang mga utang sa nagkadaiyang tambalanan mao ang; P1,730,651 alang sa Chong Hua Hospital; P352,476 alang sa Adventist Hospital; P60,000 nga wala mabayri nga bayronon alang sa Perpetual Succor; P92,647 alang sa Cebu Velez; P372,069 alang sa Sacred Heart Hospital Southwestern; P135,000 alang sa Cebu City Medical Center; P3,912 alang sa Guba Community Hospital; P5,803 alang sa Asian Renal Care; P18,430 para sa Saint Vincent General Hospital; P309,142 alang sa Cebu Doctors University Hospital; P2,000 alang sa Nephrology Center sa Cebu City Dialysis; ug P15,950 alang sa PVC Dialysis Company.

Kini kuhaon ubos sa Maintenance and Other Operating Expenses (Prior Years) ubos sa All LSA ug sa Office of the City Administrator sa Supplemental Budget 2.

Atol sa diskusyon sa wala pa ang pag-aprobar, namatikdan ni Konsehal Nestor Archival Sr. nga ang resolusyon naglista lamang sa kinatibuk-ang mga utang sa matag tambalanan, apan wala malakip ang mga ngalan sa mga pasyente.

Hinuon, gipasabot ni Konsehal Rey Gealon nga ang pagbutyag sa mga ngalan sa mga pasyente nga nalambigit sa maong mga medical bills makalapas sa Republic Act 10173, o naila nga Data Privacy Act. Gipasabot niya nga kini nga balaod nanalipod sa personal nga data.

Dugang pa niya nga bisan kun ang Cebu City Council maoy nagbayad sa mga gasto sa pagpatambal sa maong mga pasyente, dili angay ibutyag sa publiko.

Gipasalig ni Gealon nga nasayod ang City Government sa mga ngalan sa maong mga pasyente, nga natala sa records, ilabina pinaagi sa Letter of Authorization (LOA).

Gipasabot ni Konsehal Jocelyn Pesquera nga kinahanglang sulbaron na kining mga utang ubos sa CHAMP tungod kay kini maoy hinungdan ngano nga gibalibaran sa mga tambalanan ang mga pasyente nga gi-endorso sa kagamhanan sa dakbayan.

Si Konsehal Franklyn Ong miuyon usab niini, ug midugang nga nakadungog siya og mga pamahayag nga ang CHAMP karon naglihok nalang isip usa ka "refund office" alang sa mga nabayran na nga medical bills tungod kay ang pipila ka mga ospital wala na gi honor ang mga LOA tungod sa nangaging mga bayronon.

Dugang pa niya nga gusto niya nga masusi kung ang mga pasyente nga gi-endorso sa City Government madawat na ba pinaagi sa gi-isyu nga mga LOA pagkahuman gyud sa pagpatuman sa pagbayad.

Gipasabot ni Wenceslao nga mao kini ang ilang giduso nga aprobahan ang resolusyon, aron mabayran ang mga tambalanan ug maka-accommodate sa mga pasyente ug benepisyaryo sa CHAMP.

Hinuon nipadayag og kabalaka si Ong sa kakuwang sa Memorandum of Agreement tali sa Cebu City Government ug sa mga tambalanan aron pagseguro nga mao na kini ang mahitabo sa higayon nga mabayran na ang mga utang.

Bisan sa pag-abstain ni Archival sa pagbotar, giaprobahan sa konseho ang resolusyon. (BANAT NEWS)