Bercede nabalaka sa pagsulod sa uranium sa Mandaue

CEBU, Philippines — Gipadayag ni Mandaue City mayor Glenn Bercede ang gibati niyang kabalaka sa gikataho nga nakasulod sa siyudad sa Mandaue ang kemikal nga isagol sa paggama og nuclear kun uranium.

Suma pa sa mayor nga delikado alang sa panglawas sa mga molopyo kon ugaling tinuod nga nakasulod na ang uranium, usa ka matang sa radioactive chemical.

Subay niini giawhag ni Bercede ang National Bureau of Investigation sa pagpalawom pa sa ilang imbestigasyon sa pagkasakmit sa maong matang sa chemical tungod kay dili sayon ang pagpasulod niini sa siyudad.

Dugang pa niya nga nagkinahanglan kini og concrete ug steel container nga gitawag og dry cask aron dili makahungaw ang iyang radioactive materials nga maoy makahatag og kadaut sa panglawas sa mga tawo.

Sa nasayran niadtong Lunes gipahibawo sa NBI ang pagkasakmit sa kapin usa ka kilo nga radioactive materials atol sa operasyon nga ilang gihimo sa mga buwan sa Oktubre ug Nobiyembre sa siyudad sa Mandaue, Pasay City, Cagayan de Oro City ug Dagupan City ug nasikop usab ang tulo ka mga suspetsado nga nipalusot niini.

Ang tanang nasakmit nga mga butang naila nga dunay sagol nga uranium suma pa sa NBI.

Segun pa sa NBI nga gihimo nila ang operasyon human nangayo og tabang ang Philippine Nuclear Research Institute (PNRI) ngadto kang NBI director Jaime Santiago aron masulbad ang illegal nga pagpalusot sa uranium. (BANAT NEWS)