Way epekto sa Cebu ang pagbuto sa Kanlaon

CEBU, Philippines — Walay direktang epekto sa Sugbo ug sa tibook Central Visayas, ang pagbuto sa Mount Kanlaon sumala sa Office of the Civil Defense (OCD) Region 7.

Matud pa sa pangulo sa OCD-7 Joel Erestain, base sa ilang konsultasyon sa Philippine Atmospheric, Geophysical and Astronomical Services Administration (PAGASA), wala nipabor ang hangin padulong sa mga lugar sa rehiyon siete, hinongdan nga dili direkta ang epekto sa Central Visayas.

“So far westward po talaga ang winds. So hindi po, wala po direct effect. Yung Canlaon city, nasa east part from the crater. May mga parts na may kunting sulfuric smell pero wala namang ashfall,” matud ni Erestain atol sa teleconference nga gihimo uban sa pipila ka sakop sa media.

Bisan og walay direktang epekto pipila ka mga local government units sa kasadpang bahin sa lalawigan sa Sugbo ang mipahimangno na daan sa mga residente na magbantay ug magmatngon sa posibleng ashfall gikan sa Kanlaon.

“Mask up. Stay at home kung mahimo. Cover your water supplies,” abiso ni Barili Mayor John John Garcia.

Susamang awhag pud ang gihimo sa siyudad sa Toledo sa mga residente niini nga magsul-ob og mask aron maprotektahan ang panglawas, hilabina sa mga adunay sakit sa baga.Si Wilson Ramos, ang tigpamaba sa Provincial Disaster Risk Reduction and Management Office (PDRRMO) nagkanayon nga ilang gipanid-an ang direksyon sa hangin.

Ang bulkang Kanlaon, mibuto kini pasado alas 3 sa hapon niadtong Lunes, Disyembre 9 kon diin miabot sa 1,669 ka tonelada sa sulfur dioxide ang gibuga niini.

Ang pagbuto sa maong bulkan niabot og halos upat ka minutos sumala sa Phivolcs ug miabot pud sa 20 ka volcanic earthquakes ang natala.

Sa pagkakaron giisa sa alert level 3 ang Kanlaon, hinungdan nga girekomendar ang pagbakwit sa mga nagpuyo sulod sa unom (6) ka kilometro gikan sa crater sa bulkan.

Niawhag pud ang OCD-7 sa mga nagpuyo sa Canlaon City nga mobakwit hilabina nga dili matagna kun unsa pay mahitabo sa bulkan tungod kay ilang nahibaw-an wala ra miabot og 300 ka tawo ang nibakwit human sa pagbuto sa bulkan, base sa rekord kagahapon sa buntag.

Nangandam

Mimando ang Cebu Police Provincial Office(CPPO) sa Toledo City Police Station nga mangandam subay niining pagbuto sa Mt. Kanlaon niadtong Lunes sa hapon Disyembre 9, 2024 aron masiguro ang kaluwasan sa komunidad.

Matod ni Police Captain Eden Rex Baguio, Public Information sa CPPO nga bisan og wala direktiba nga naapektuhan ang Toledo City gitan-aw nila ang indirect impact niini sama sa ash fall, pagkabalda sa transportation ug komunikasyon.

Nanghatag sab og facemask ang LGU ug kapulisan aron malikay sa posibleng epekto sa ash fall ilabi na sa mga tawo nga dunay respiratory problems.

Samtang ang Visayas Command sa ilang bahin naka high-alert sa ilang Humanitarian Assistance and Disaster Response(HADR) teams ug nitabang na karon sa mga naapektuhan sa pagbuto sa Mt. Kanlaon.

Mimando sab ang Visayas Command sa ilang units sa  Negros Island nga makig-alayon sa Local Disaster Risk Reduction and Management Councils sa ilang tagsa-taga ka lugar aron makatabang nga malikayan ang kadaot sa pagbuto sa bulkang Kanlaon.

Oratio Imperata

Sa laing bahin, gitahasan ni Archbishop Jose Palma sa Archdiocese of Cebu ang Commission on Worship Chairman Glenn Therese Guanzon para sa pagpagawas og pag-ampo may kalabutan kalamidad ug ingon man ang Cebu Caritas Inc. sa tabang nga mahatag sa mga apektado sa pagbuto sa Mt. Kanlaon.

Ang Cebu Caritas Inc. nga gipangulohan sa President Fr. Alex Cola gimandoan sa pagpanguna ug paghimo sa plano aron sa paghatag ug subsidy o tabang ngadto sa mga apektado sa pagbuto sa maong bulkan.

Gitug-an sa Arsobispo, angayan gayud ipadagayday ang tabang ilabi na ngadto sa mga apektado tungod kay ato gihapon silang mga igsuon.   BANAT NEWS