Outstanding Lupon sa probinsiya gipasidunggan
CEBU, Philippines — Makapaabot og proyekto sa imprastraktura gikan sa Kapitolyo ang mga outstanding Lupong Tagapamayapa sa Probinsya sa Sugbo.
Atol sa gipahigayon nga pasidungog sa maong mga trabahante sa barangay niadtong Disyembre 9, siyam (9) ka mga lupon ang gihatagan og pasidungog gikan sa nagkadaiyang barangay sa lain-laing kategorya.
Sa Lupong Tagapamayapa Incentives Awards (LTIA), ang mga winner nakadaog og tag P400, 000, ang first runner-up P200, 000, samtang ang second-runner up P100, 000 ang premyo.
Sa 4th ngadto sa 6th class municipality nga kategorya, ang nakadaog mao ang lupon sa barangay Villahermosa sa lungsod saTudela diin 1st runner-up ang Barangay Ibabao, sa lungsod sa Sogod ug ang 2nd runner-up ang barangay Tagnucan sa lungsod sa Borbon.
Alang sa 3rd ngadto sa 1st class municipality nga kategorya, ang nakadaog mao ang barangay Ibabao sa lungsod sa Cordova; 1st runner-up ang barangay Lamac, Pinamungajan ug ang 2nd runner-up ang barangay Argawanon, San Remigio.
Samtang sa component cities nga kategorya, ang nakadaog mao ang barangay Gairan, Bogo City; first runner-up ang Brgy. Poblacion, Danao City ug ang 2nd-runner-up ang Brgy. Bulacao, Talisay City.
Si gobernador Gwendolyn Garcia, mianunsyo nga gawas sa proyekto sa imprastraktura, umentohan usab ang premyo sa LTIA sunod tuig kon ang mga top-performing nga mga barangay makadawat og P500, 000. Ang first runner-up makadawat og P300, 000; P200,000 ang second runner-up ug ang mga finalist makadawat og tag P100,000.
Gipasidunggan ni Garcia ang mga lupon sa nahimong tampo niini sa mga barangay ilabina sa pag-areglo kon adunay gubot tali sa mga residente.
Mitambong sa maong kalihokan sila si DILG assistant regional Director Atty. Ian Kenneth Lucero ug DILG provincial director Dr. Jesus Robel Sastrillo. MEL BANAT NEWS
- Latest
