Mga nasunog nga bahin sa Cansojong i-reblocking una

CEBU, Philippines —  Ipaubos una sa reblocking ang lugar nga nasunog sa dili pa makatukod sa ilang bag-ong panimay ang apektadong pamilya.

Si Kapitan Vicente Oberes sa Barangay Cansojong nibutyag padayon pa nga nagpuyo sa basketball gym ang mga apektadong pamilya. Ang sunog nitumaw niadtong miaging semana diin 44 ka pamilya o 168 ka indibidwal ang apektado.

Matud pa ni Oberes nga ila una nga himuon ang reblocking aron mahan-ay ang lugar ug adunay saktong ka agi-an.

Si Mayor Gerald Anthony “Samsam” Gullas maoy personal nga nihatag sa pinansyal nga ayuda niadtong Lunes uban sa iyang mga konsehales.

Ang City Social Welfare and Development (CSWD) mao ang niandam sa pagkaon sa apektadong pamilya gikan sa pagkahitabo sa sunog hangtud sa tulo ka adlaw. Ang taga barangay sab ang nipuli sa paghatag og pagkaon sa mga nasunogan sa nahabilin nga adlaw.

Ang lugar dili lang kini layo sa unang nasunog niadtong Marso karong tuiga.

Sa pikas bahin, nakadawat og pinansiyal  nga ayuda gikan sa nasudnong kagamhanan  ang mga biktima sa sunog sa  Sitio  Sta  Maria sa Barangay  Pusok, siyudad sa Mandaue.

Ang maong mga biktima nga gilangkoban sa 773 ka mga pamilya sa Barangay Pusok 26  ka pamilya sa Barangay Looc   sa Siyudad  sa Mandaue  ang nakadawat og pinansiyal nga ayuda  nga P10,000   ang matag pamilya.

Kahinumdoman nga nahitabo ang maong sunog  sa Sitio Sta.  Maria  sa Barangay Pusok  sa bulan sa Disyembre  2023. 

Ang pagpanghatag sa ayudad gihimo  diha sa Mandaue City Sports  and  Cultural Complex sa Sitio  Tribunal sa Barangay  Centro  sa Siyudad sa Mandaue.

Samtang  ang mga biktima sa sa sunog niadtong Abril 13 ning tuiga nga taga  Sitio Under The Bridge (UTB) sa Barangay  Looc  gitunolan sab og tag P10,000.