Inahan sa mga batang gipatay sa amahan dili katuo sa nahitabo

CEBU, Philippines — "Sakit kaayo palandungon." Kini maoy pulong sa inahan sa 5- anyos ug 3- anyos niyang mga anak  nga babaye nga gipamusil patay sa ilang amahan ug pagkahuman nagkutlo sab sa iyang kinabuhi niadtong Huwebes sa buntag diha sa Purok San Roque, Barangay Buntis, Lungsod sa Bacong, Probinsiya sa Negros Oriental.

Matud sa inahan nga wala siya magdahom nga buhaton kadto sa iyahang bana kay ang plano lang matud huwaman ra niini ang ilahang mga anak.

Ang bana niadto sa gipuy-an sa iyang manag-inahan alas 7:30 sa buntag niadtong Huwebes kay gusto niyang huwamon ug mamauli ra sila alas 10 sa buntag.

"Nasakit ang mga bata, gahilanat, gaubo, niingon ko unya na og maayo, ako siyang giingnan unya na og maayo, gasakit bg mga bata gahutoy-hutoy, giubo-ubo nga gahi kaayo tapos imo ng isuroy mao nay iyahang gikalagutan," sigon sa inahan nga nahinabi sa dySS Super Radyo Cebu.

Apan kalit nga niibot og armas ang suspek ug gipangtionan matud pa ang ilang mga anak maong giingnan kini sa ginang nga walay sala ang mga bata.

Unang gipusil sa amahan ang 5-anyos nga bata atbang sa ilang tindahan samtang nagtungko ug naigo sa ulo.  Dayon gisunod niini ang 3-anyos nga atong higayona naglingkod sa motor ug nakita nalang sa inahan nga natagak kini kay naigo sab sa ulo.

"Akong giingnan akoy pusila kay akong mga anak wala'y sala, ayaw duhiga kay taas pa na sila og kaugmaon," sa inahan pa.

Matud pa sa ginang nagkaestorya na sila sa bana kaniadto bahin sa ilang duha, apan iyaha kining gipasabot nga wala nay paglaum nga magkauli pa sila tungod sa pagsige niini og pangulata kaniya, gusto nalang sa ginang nga atimanon nalang ilang mga anak.

Ang rason matod pa maong mangulata ang bana gumikan sa kalisod sa ilang sitwasyon unya kun mag-away sila damayon ang pamilya sa babaye ug tamayon.

Giplanohan sab sa iyang bana nga dad-on sila og Leyte apan wala siya mosugot tungod kay hingulata kini, walay pamilya didto ug basin ilubong ra siya og buhi.

"Wala gihapon siya'y kausaban sa iyang pagpangulata nako, makahadlok na, makuyawan nako," sigon sa inahan. Sa dihang uyab pa sila dili kini manapat apan sukad nag-ipon na sila giingong didto nigawas ang batasan sa iyang bana. IBM BANAT NEWS