Ordinansa alang sa mga establisamento ipatuman sunod tuig

CEBU, Philippines — Sugod sa Enero 2025 istrikto na nga ipatuman sa Cebu City Environment and Natural Resources Office ang City Ordinance 2754 o ang Sustainable Development Ordinance ngadto sa mga business establishments sa siyudad.

Giawhag ang sobra sa 38,000 ka negosyante sa siyudad sa pagsunod sa environmental laws and ordinance aron dili kini masilotan ug dili usab mabawian og permit

Ang legal officer sa CCENRO nga si Atty. Klive Eric Ravanes nagkanayon nga ang ilang buhatan nakig-alayon na sa Business Permit and Licensing Office (BPLO) alang sa pagpatuman sa maong ordinansa.

Matud ni Ravanes nga ang bag-ong ordinansa nag-amenda kini sa City Ordinance 2243 nga nagkinahanglan sa negosyo nga mosumiter kini og notariyado nga Environmental Sustainability Action Plan (ESAP).

Ang ESAP mao kini ang version sa dakbayan sa Environmental Compliance Certificate nga giisyu sa Department of Environment and Natural Resources ngadto sa mga establisemento kansang mga operasyon makaapekto sa palibot nga komunidad ug eco-system.

Gikinahanglan usab nga magkuha ang negosyante og ESAP gumikan kay usa kini sa mga resikitos aron maisyuhan og business permit.

Awhag ni Ravanes nga motuman lang sa mga palisiya sa siyudad lakip sa pagpatuman sa segregation and source policy aron malikayan nga makamulta ug masilotan. BDB BANAT NEWS