CEBU, Philippines — Giaprobahan sa Regional Development Council Development Administration Committee (RDC-DAC) Region 7 ang Development Administration Committee (DAC) resolution nga nagpakita og suporta sa pagpasar sa Magna Carta alang sa mga Public Disaster Risk Reduction and Management (DRRM) Workers.
Gipasabot ni Engr. Philip Ponte, ang chief sa Policy Development and Planning Section sa Office of Civil Defense (OCD)-7, ang Magna Carta nagtinguha nga mapaayo ang kahimtang sa mga DRRM workers pinaagi sa dugang benepisyo ug pagdasig sa mga kwalipikado nga indibidwal nga mosulod ug magpabilin sa serbisyo sa gobyerno sa natad sa disaster management.
Ang balaodnon sa Magna Carta for Public DRRM Workers giaprobahan sa House of Representatives niadtong Enero 31 ug kasamtangang ubos sa committee deliberations sa Senado.
Sumala sa news release sa Philippine Information Agency (PIA)-7, atol sa miting sa DAC, gipadayag ni Ponte ang ka importante sa pag-suporta sa mga lokal nga DRRM workers, diin naghisgot nga daghan kanila ang wala pa makadawat sa mga benepisyo nga angay nila madawat bisan pa sa ilang dedikasyon sa trabaho.
Gihimug atan usab ni National Economic and Development Authority (NEDA) 7 regional director ug RDC-DAC vice chair, Jennifer Bretaña, ang importansya sa Magna Carta, ug miingon nga gisuportahan kini sa konseho.
Ang resolusyon sa DAC iduso sa Central Visayas RDC Full Council aron pormal nga irekomenda sa konseho ang pag-aproba sa Magna Carta para sa mga DRRM workers. — (BANAT NEWS)