CEBU, Philippines — Nadakpan sa Mambaling Police Station sa Cebu City Police Office (CCPO) ang suspetsado sa pagpatay ug paglabay sa 22-anyos nga dalaga diha sa u-turn slot ug duol sa opisina sa Bantay Dagat Commission, Dakbayan sa Sugbo.
Ang suspetsado giila nga si Jason Cullamat, 30-anyos, taga Lungsod sa Barili, minyo, adunay tulo ka anak ang nadakpan sa kapolisan diha sa Sitio Libo, Barangay Tayud, Lungsod sa Consolacion kagahapon sa alas 5:00 sa hapon.
Matud ni Police Major Efren Diaz, Jr., hepe sa Mambaling Police Station nga nasubay nila ang suspek pinaagi sa backtracking nga gihimo nila sa footages sa closed circuit television (CCTV).
Nakuha sa footage ang sakyanan nga gi-identify sa mga saksi ilabi na sa amahan sa biktima kinsa maoy naghatud sa iyahang anak ug nakakita sa multicab nga nasakyan sa biktima ug ang suspetsado maoy drayber sa maong multicab.
"Gi-flag down nato didto sa may Consolacion kay wala man siya nihunong so gigukod namo unahan sa RTC", butyag ni Diaz.
Si Cullamat nihimakak kini sa pasangil batok kaniya apan matud ni Diaz nga aduna sila’y mga ebidensiya batok sa suspetsado.
Padayon usab ang imbestigasyon sa kapolisan pagpiho sa motibo sa krimen samtang gikatakdang pasakaan og kasong murder ang suspetsado.
Ang patay’ng lawas ni Neca Denise Lagria, cashier sa usa ka kan-anan sulod sa mall sa Dakbayan sa Mandaue, residente sa Sitio Silot, Barangay Yati, Lungsod sa Liloan gidala diha sa Saint Francis Funeral Homes ug giila kini sa iyang mga ig-agaw ug igsuon.
Si Jnypher Noval, ig-agaw sa biktima nagkanayon nga sayo nga nimata ang iyang ig-agaw gumikan kay sayo kini nga moadto sa trabahoan tungod kay aduna sila’y meeting ug gihatud kini sa iyang amahan diha sa eskina sa Barangay Yati.
Nianang gabii sa maong adlaw nagpaabot ang mga ginikanan sa biktima apan dili na kini ma-contact ug hangtud pagkabuntag wala gihapon kini mauli.
Ang amahan ug usa ka igsuon sa biktima niadto sa gitrabahoan niini ug nakompirma nila nga adunay meeting apan wala na makatambong sa maong meeting si Neca. (Decemay P. Padilla/BDB)
Nagpadayon ang pagtaud niining gitawag og louvre sa atop nga bahin sa Cebu Bus Rapid Transit station, nga dunay desinyo nga mora og dahon diha haduol sa Fuente Circle sa Osmeña Boulevard. Hulagway kuha ni Joy Torrejos — (BANAT NEWS)