CEBU, Philippines — Nihatag og katin-awan ang Police Regional Office (PRO)-7 may kalaboton sa balita nga nigawas sa usa ka pamantalaan mahitungod sa findings sa Dahas Project, usa ka pagtuon nga gihimo sa Third World Studies Center sa College of Social Sciences and Philosophy sa University of thr Philippines-Diliman nga nag-ingong ang Cebu maoy pinakadaghang kaso sa mga napatay sa war on drugs ning tuiga.
Una niini, niadtong November 18, 2024 usa ka balita ang nigawas nga may kalabutan niini nga nagbase sa pagtuon sa Dahas Project gikan sa Enero 1 hantod sa Oktubre 15, 2024 nga nagpakitang adunay 65-drug related deaths sa Cebu, 21 percent kini sa 312-drug related deaths sa tibuok Pilipinas.
Giila sa PRO-7 ang papel sa academic institutions ingon man ang mga tigbalita sa public safety ug security ilabi na sa peace and order initiatives sa law enforcement agencies.
Apan tinguha sa PRO-7 nga maklaro ang pipila ka mga importanteng punto sa balita nga nigawas aron mas kahatagan ang publiko og dugang objective understanding sa sitwasyon nga gipresentar sa Dahas Project.
Sigon sa PRO-7 wala sila giimibitar aron mahimong parte sa maong pagtuon. Wala sab matod pa sila gi-interview may labot sa research ingon man wala say request nga niabot sa ilaha alang sa official data.
Hinungdan nga inaccurate matud pa ang data sa maong pagtuon ug wala kini nagpakita o dili maoy tinud-anay nga sitwasyon dinhi sa Cebu.
Matud pa sa PRO-7 ang data nga gi-presentar sa maong balita naglangkob sa crime data sa PRO-7 nga gikan gyud sa Crime Incidents Reporting Analysis System (CIRAS).
Sa datos sa CIRAS sa PRO-7 usa lang ang nadeterminar sa Cebu City Police Office nga drug-related killing, kini base sa ilang initial investigation gikan sa Enero hangtod sa Oktobre 15, 2024 sama sa gibasehang mga panahon sa maong pagtuon sa Dahas.
Sa pikas bahin, sa Cebu Province, 11 ka drug-related killings ang natala, napulo niini cleared o nasulbad na human natumbok kun kinsa ang mga naghimo sa krimen ug napasakaan og mga kaso.
Ang maong 12 ka drug-related deaths dili polis ang nalambigit o wala nahitabo atol sa anti-drug operations kondili, binuhatan sa mga drug traffickers batok sa mga biktima nga ilaha rang kauban sa illegal drug trade apan nakasala sa grupo.
"Respectfully, the PNP units are equipped with the authority, competence, and resources to conduct full-blown and professional investigations on the motives of murder cases," tipik sa pamahayag sa PRO-7.
Gihimug-atan sab sa PRO-7 nga ‘inaccurate’ o dili husto ang paggamits sa terminong "drug war" o “war on drugs” sa maong balita .
Ang mga napatay nga gihulagway sa maong pagtuon ug sa paagi sa pagbalita nga kini “drug-related murders,” mga biktima sila sa mga criminal o drug traffickers tungod sa kalambigitan sa ilang kalambigitan sa illegal drug transactions, matud pa sa kapolisan.
Maghatag matod pa kini og kalibog sa publiko kining paggamit sa terminong drug war. Giklaro sa PRO-7 nga ang pamaagi nila karon sa ilang anti-drug operations walay paglugak, highly analytical ug nagtamod sa Police Operational Procedures.
"The more than P1 billion worth of shabu confiscated from January to the present speaks of this level of aggressiveness. To point out, in all these operations, no human rights violations are recorded. While we appreciate the role of mass media in assisting us in informing the public, we appeal for objectivity and accuracy in the information that we share with the public," sigon pa sa PRO-7. (BANAT NEWS)