Mga benepisyaryo sa Agrarian Reform nakadawat na og titulo sa yuta

CEBU, Philippines — Ang Department of Agrarian Reform (DAR) Central Visayas bag-o lang nanghatag og Certificates of Land Ownership Award (CLOA), Electronic Titles (E-Titles), ug Certificates of Condonation with Release of Mortgage (COCROM) ngadto sa Agrarian Reform Beneficiaries (ARBs) sa Dumaguete City, Negros Oriental. Base sa press release sa DAR-7, kini nga programa kabahin sa New Agrarian Emancipation Act (NAEA) o ang Republic Act No. 11953, nga nagtinguha sa paghatag og gahum sa sektor sa agrikultura ug pagtabang sa mga mag-uuma sa Pilipinas sa pagpauswag sa ilang pinansyal nga kahimtang.

Sa kinatibuk-an, 75 ka CLOAs nga naglangkob sa 73.13 ka ektarya nga yuta ang naapod-apod sa 98 ka ARBs, uban sa 2,225 ka E-Titles nga nakabenepisyo sa 1,642 ka ARBs sa 2,269.53 ka ektarya.

Dugang pa, 6,707 ka COCROM ang magahatag og kagawasan sa 5,549 ka mga ARBs gikan sa utang nga may kalabotan sa yuta, nga naglangkob sa 71,580.42 ka ektarya ug nagrepresentar sa tibuok kantidad nga financial condonation nga P727,750,154.39.

Matud sa DAR-7 ang kalihukan nga nagpahigayon sa seremonya nga paghatag sa CLOAs, E-Titles, ug COCROM gitambongan sa mga representante sa ARB gikan sa nagkalain-laing lungsod sa Negros Oriental nga nakadawat niini isip kabahin sa lukop nasud nga agrarian reform program sa gobyerno. (BANAT NEWS)