Flower Festival gipahigayon sa dakbayan sa sugbo

CEBU, Philippines — Ang kagamhanan sa dakbayan sa Sugbo nagsaulog na usab sa Flower Festival, usa ka pamaagi sa pag promote ug pagsuporta sa mga mag-uuma sa kabukiran sa siyudad nga nanginabuhi pinaagi sa pagtanum og mga buwak.

Atol sa kasaulogan kagahapon gipakita sa mga upland barangays ang katahom sa nagkadaiyang buwak ug ubang mga produkto sa mga mag-uuma.

Dili mominos sa dose ka mga floats nga napuno sa nagkadaiyang buwak uban pa sa mga dayan-dayan ang misalmot sa panindotay atol sa tinuig nga Cebu City Flower Festival diha sa Plaza Sugbo. Nagtigi usab sa panindotay ang mga payag-payag nga gibutangan sa nagkadaiyang produkto sa bukid.  Lakip sa gigamit nga mga bongbong sa pipila ka payag ang mga utanon sama sa mga leafy vegetable, kamatis, atsal ug uban pa.

Giladlad usab ang nagkadaiyang prutas sama sa manga, saging ug uban pa, sama sa payag sa Barangay Agsungot nga napuno sa buongon ang ilang display nga gikan mismo sa ilang barangay.

Maguwang ra sa pangayo ang presyo sa tag kinse ngadto sa bente pesos ang buok og pwede pa gani ilibre nila.  Nipasundayag sab ang dili mominos sa 12 ka maanyag nga dalaga isip festival queen gikan sa ilang barangay nga girepresentaran. Matud pa ni Joey Baclayon, City Agriculturist ang flower festival gigahinan og kapin sa tres milyones pesos alang sa mga mananaug.

Ang maong kalihukan pagpakita usab kini sa kaabunda sa produkto sa mga mag-uuma sa kabukiran sa dakbayan sa Sugbo.  MEL BANAT NEWS