Mga proyekto alang sa enerhiya gipadayag sa energy forum
CEBU, Philippines — Nagtapok ang mga stakeholder sa sektor sa enerhiya sa The Freeman Powering Cebu Energy Forum kagahapon aron tukion ang kasamtangang sitwasyon sa enerhiya sa Sugbo ingon man ang umaabot niini samtang nagtan-aw sa integrasyon sa mga renewable.
Si Cebu Provincial Governor Gwendolyn "Gwen" Garcia ug Department of Energy Assistant Secretary Mario C. Marasigan maoy nahimong keynote speakers sa forum. Samtang ang mga speakers mao silang si Philippines ACCIONA ENERGIA Country Manager Fermin Alvarez, Aboitiz Power Thermal Business Group Chief Engineer Rolando J. Paulino Jr., OIC-Assistant Vice President sa Visayas System Operations System, NGCP, ug VECO President ug COO Raul Lucero.
Anaa usab ang mga panelist sama nila ni Jay Y. Yuvallos, ang Presidente sa Cebu Chamber of Commerce and Industry, Alfred M. Reyes, ang Presidente sa Hotel Resort and Restaurant Association sa CeBu Inc., ug Fred P. Languido, News Editor sa The Freeman Newspaper.
Si DOE Assistant Secretary Mario C. Marasigan niingon nga ang Cebu usa ka kritikal nga energy hub alang sa Kabisay-an nga nagsilbi nga nag-unang interconnection point alang sa transmission sa enerhiya gikan sa Mindanao ngadto sa Luzon, ug uban sa bag-ong transmission facility projects, kini makasiguro sa kasaligan ug lig-on nga suplay sa enerhiya sa tibuok Visayas Islands.
Apan, matud ni ACCIONA ENERGIA Country Manager Fermin Alvarez sa Pilipinas sa kinatibuk-an, ang sistema wala gi-upgrade ilabina sa daghang mga probinsya mao nga giingon niya nga ang posible nga mga solusyon mao ang paghimo sa grid nga digitalized, smarticized, ug kinahanglan nga maabot sa AI nga lebel.
Nunot niana, iyang gipadayag ang pagpa-green sa grid pinaagi sa renewables sama sa coals, solar, wind ug uban pa. Matud niya nga kini barato ra ug ang solar plant pwede nga mahimo sulod sa duha ka tuig lang samtang ang wind farm sa duha hangtud upat ka tuig lamang.
Gisugyot usab ni Marasigan ang paghimo sa kayutaan sa rehiyon nga sustainable sa solar energy o kung mahimo, floating solar energies pinaagi sa paggamit sa katubigan aron ma-accomodate ang demand sa supply sa tibuok rehiyon.
Kining tanan aron mas mapalambo pa ang enerhiya sa Cebu ug matud pa ni Gov. Gwen ang kuryente importante para sa kalamboan kay naghatag kini og kinabuhi sa ekonomiya, nga kung walay kuryente, walay kalamboan. MEL BANAT NEWS
- Latest
