Walo ka barangay napiling pilot area sa garbage segregation
CEBU, Philippines — Walo ka barangay sa Dakbayan sa Sugbo ang gipili nga magsilbing pilot areas alang sa subli nga pag-implementar sa “No Segregation, No Collection” policy.
Gilangkuban kini sa mga barangay sa Tinago, San Roque, Carreta, Barrio Luz, Mabolo ug Basak Pardo.
Lakip usab ang Tejero ug Basak San Nicolas nga naningkamot sa pagbalik sa maong palisiya.
Ang overseer sa Solid Waste Management Board (SWMB) nga si Ma. Emma Ramas nagkanayon ngadto sa Cebu City New and Information nga aktibo ang Tejero sa pagpahigayon og managlahi nga mga koleksiyon alang sa biodegradable ug non-biodegradable nga mga basura samtang ang Basak San Nicolas nagsugod na sa solid waste management initiatives sukad pa sa niaging tuig.
Ang walo ka representante gikan sa mga napiling barangay, mga representante sa Cebu City Environment and Natural Resources Office (CCENRO), City Environmental Sanitation and Enforcement Team (CESET) ug Department of Public Services (DPS) makigtagbo sa city officials aron tukion ang kabahin sa implementasyon sa maong palisiya.
Matud ni Ramas nga tutokan nila ang kalamboan sa walo ka barangay hangtud sa unang adlaw sa buwan sa Enero 2025 diin mao usab kini ang unang adlaw sa pagpatuman sa “No Segregation, No Collection” policy sa tibuok siyudad.
Si Ramas nagkanayon nga kinahanglang ipatuman sa mga barangay ang maong polisiya isip pagsunod sa ordinansa sa siyudad ug sa Akta Republika 9003 kun “Ecological Solid Waste Management Act of 2000”.
Gipahimangnoan ni Ramas ang opisyales sa barangay nga ikiha nila ang mga mosupak sa maong balaod ug kadtong wala maapil sa walo ka barangay mamahimo usab sila nga magpasiugda og mga paagi sa pagpahimutang sa ilang mga basura.
Sa laing bahin, niuyon ang Cebu City Environment and Natural Resources Office sa ordinansa ni Konsehal Jose Lorenzo Abellanosa sa pagdili og paggamit og mga disposable tableware and food containers sa tanang food establishments sa siyudad.
Ang maong ordinansa nasubay kini sa Akta Republika 9003. BDB BANAT NEWS
- Latest
