PRO-7 busy pagpanakop bisan kalag-kalag
CEBU, Philippines — Moabot sobra usa ka libo ka tawo ug kapin P3 milyones nga ilegal nga drugas ang nangadakpan sa kapolisan atol sa kalagkalag dinhi sa Central Visayas.
Wala molugak ang kapulisan sa Central Visayas sa ilang anti-criminality ug law enforcement operations gikan sa Nobiyembre 1 hangtod sa petsa 2, 2024 atol sa pag-obserbar sa adlaw sa mga santos ug sa mga minatay.
Kini tungod kay niabot sa 1,644 ka mga indibidwal ang nabalhog sa prisuhan ug didto na sila nagkalag-kalag.
Kapin sa P3 milyones nga balor sa drugas ang nasakmit ug 62 ka tawo ang ilang nadakpan. Samtang 62 sab ka sugarol ang nadakpan ug nasakmit ang dul-an P16 mil nga mga pusta.
Tulo ka tawo sab ang nadakpan tungod sa loose firearms ug 12 ka armas ang nakompiskar sa ilang 11 ka operasyon.
Duna say 28 ka wanted persons ang nasikop. Ang uban nakalapas sa nagkalainlaing lokal nga mga ordinansa.
Niadtong Nobiyembre 2, nadakpan sa kapolisan ang usa ka 51-anyos nga si Jerald Rabaga Radaza alyas Damlog, 51, nga taga Sabellano St., Sitio Greenbelt Brgy. Quiot ning siyudad. Nadakpan siya sa buybust operation sa mga sakop sa Labangon Police Station Cebu City Police Office diha sa Sitio A. Lopez Street, Barangay Labangon, siyudad sa Sugbo n.
Matud ni Police Major Eraño Regidor, hepe sa Labangon Police Station dugay na nilang gibantayan ang suspek ug nianang adlawa dunay nakatug-an nila nga naa sa lugar ang suspek mao nga ilaha kining gipalitan og shabu.
Human nitunol sa drugas, gidakop kini dayon sa mga polis ug nakuhaan kini og 10.2 gramo nga gituohang shabu nga nagkantidad og dul-an sa P70 mil. — /IBM (BANAT NEWS)
- Latest
