“Canva for Education” gilusad sa DepEd

MANILA, Philippines —  Makadawat og libreng access ug pagbansay-bansay sa Canva for Education ang mga magtutudlo ug kawani sa publikong eskwelahan sa tibuok nasud sugod karong buwan sa Nobiyembre, subay sa pakigtambayayong sa Department of Education (DepEd) sa Canva Philippines.

Niadtong Miyerkules, si Education Secretary Sonny Angara mipirma og partnership sa Canva Philippines alang sa paglusad sa "Canva for Education" aron sa dugang pagdala sa digital design ug creativity ngadto sa mga tunghaan ug pagsuporta sa mga magtutudlo gamit ang user-friendly nga mga kahimanan alang sa mas interactive nga pagkat-on.

Si Her Excellency HK Yu PSM, FCPA (Aust), Australian Ambassador to the Philippines, usa sa mga nag-unang mitambong sa ceremonial signing, mipasidungog sa paspas nga aksyon sa team ni Sec. Angara bahin sa partneship sa Canva for Education nga maghatag og mga gamit alang sa mga tinun-an ug magtutudlo para sa pagkat-on sa ika-21 nga siglo.

Matud ni Yu wala siya magdahom nga kini mahitabo dayon ubos sa pagpangulo ni Secretary Angara kay pipila pa lang ka bulan ang milabay sa dihang siya gitudlo isip sektetarya, nga nakigkontak si Yu aron ipakita ang padayong suporta sa Australia sa pagpalambo sa sistema sa edukasyon sa nasud.

Ang Canva for Education usa ka all-in-one nga visual communication platform nga 100% libre para sa tanang K-12 nga mga eskwelahan, magtutudlo, ug estudyante diin ma-access nila ang tanang benepisyo sa mga premium nga feature sa Canva, nga makahatag kanila og gahum sa paghimo, pagtinabangay, ug pakigkomunikar sa biswal nga pamaagi.

Ubos sa phased rollout niini, nga ilusad sa 17 ka rehiyon sugod sa Enero 2025, ang mga piniling magtutudlo ug mga kawani sa central office makabenepisyo sa pilot training gamit ang design platform sa Canva gamit ang ilang opisyal nga email sa DepEd.

Samtang si Ms. Yani Hornilla-Donato, Canva Philippines Country Lead, miingon nga panahon na para sa mga classroom sa Pilipinas nga hingpit nga dawaton ang gahum sa digital ug design literacy karon nga ang visual communication nahimo na nga parte sa mga kasamtangang trabahoan.

Nunot niana, gipadayag niya ang iyang kahinam sa panagtambayayong ug nagpaabot usab nga makita kung unsa ang resulta niini alang sa mga estudyante ug magtutudlo sa tibuok nasud. (BANAT NEWS)