Gidaghanon sa mga kabus sa CV nikunhod
BANAT, Philippines — Mius-os ang poverty incidence sa mga pamilya sa Central Visayas sa 2023 ngadto sa 12.3 porsiyento, gikan sa 22 porsyento niadtong 2021, matod sa Philippine Statistics Authority (PSA)-7.
Base sa 2023 Full Year Official Poverty Statistics nga gipagawas sa PSA-7, ang poverty incidence gikan Enero hangtod Disyembre 2023 nagtimaan og pagkunhod nga 9.7 percentage points kumpara sa 2021.
Sa pagtantiya, ang gidaghanon sa mga pobre nga pamilya sa Central Visayas niadtong 2023 niabot sa 207,000, mas ubos kumpara sa 354,000 ka pamilya niadtong 2021.
"This means that 12 out of 100 families had incomes below the amount needed to buy basic food and non-food needs in 2023," matud ni PSA-7 Chief Statistical Specialist, Engr. Leopoldo Alfanta Jr.
Sa laing bahin, ang subsistence incidence sa mga pamilya gibanabana nga 3.2 porsiyento o 53,000 ka pamilya ang wala makatubag sa ilang mga batakang panginahanglan sa pagkaon, apan kini 4.8 porsyento nga mas ubos kumpara sa 2021 nga 8 porsyento.
Matud sa National Economic and Development Authority (NEDA)-7, sa 18 ka rehiyon sa nasod, ang rehiyon 7 ang nakarehistro sa ikaduhang pinakadakong pagkunhod sa poverty incidence sa tibuok nasud.
Sa tibuok Central Visayas, ang Dakbayan sa Sugbo nag-una nga adunay labing taas nga average nga kinitaan ug gasto sa pamilya, samtang ang mga lalawigan sama sa Bohol ug Siquijor medyo ubos og kita. (BANAT NEWS NES)
- Latest
