Adlaw sa mga Santos malinawon-PRO-7   

CEBU, Philippines — Hapsay ug malinawon ang pag obserbar sa Adlaw sa mga Santos kagahapon tibuok Central Visayas, Nobyembre 1, 2024 sigon pa sa Police Regional Office(PRO)-7.

Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga 421 ka mga sam-ang sa rehiyon ang gibantayan sa kapulisan.

Gawas sa mga sam-ang apil sab sa gibantayan sa PRO-7 ang mga tourist destinations ug ubang lugar nga dugokan og daghang tawo sanglit long weekend man daghan ang nanguli sa probinsya.

 Gibana-bana nga 51,000 ka mga tawo ang niadto sa mga sam-ang sa Central Visayas kagahapong adlawa.

Samtang sa siyudad sa Sugbo, generally peaceful ang pag-obserbar sa Adlaw sa mga Santos sigon pa ni Police Colonel Antonietto Cañete, City Director sa Cebu City Police Office.

Si Cañete nilibot sa mga sam-ang, pantalan ug terminal uban iyahang Deputy City Director for Operations Police Lieutenant Colonel Maria Theresa Macatangay.

Ang CCPO nipakatap og kapin dos mil  ka polis. Giabagan kini sa mga kabomberohan, kasundalohan ug force multipliers pagbantay sa 22 ka mga sam-ang sa siyudad.

Gipabantayan hinuon ni Cañete ang mga pantalan ug terminal batok aning mga taxi drivers nga mopahimulos sa kahigayunan.

Samtang hugot sab ang pagbantay sa mga sakop sa  Mandaue City  Police  Office (LCPO)  ang mga sam-ang sa dakbayan. Apan sa Saint Joseph Cemetery dunay mga kutsilyo, tigib, ug nagkadaiyang mga lighters nga gidili pagdala sulod sa sementeryo ang ilang gisakmit diha palang sa entrada.

Samtang si Police  Lieutenant Colonel  Christian Torres,  tigpama   sa LCPO miingon nga gawas sa pagbantay sa mga sam-ang gipangusgan sab nila ang police checkpoints sa kadalanan.  IBM BANAT NEWS