Rama gusto nga hagoan sa anak ang posisyon

CEBU, Philippines — “We will cross the bridge when we get there,” mao kini ang bugtong pamahayag ni Atty. Mikel Rama human siya opisyal nga gi-nominate sa konseho sa Dakbayan sa Sugbo aron maoy mohulip sa bakante nga posisyon sa ika-16 nga Sangguniang Panglungsod nga gibiyaan ni Konsehal Donaldo Hontiveros tungod kay nilingkod na kini isip bise mayor sa dakbayan.

Atol sa press conference kagahapon, giklaro sab ang iyang amahan nga si dismissed mayor Michael Rama nga wala siya’y kalambigitan sa nahitabong pag-endorso sa iyang anak ngadto sa konseho nga gi-presentar ni Konsehal Philip Zafra.

Gani, dili sab kini interesado sa maong nominasyon alang sa iyang anak tungod kay gusto niya nga maghago gyud si Atty. Mikel sa maong posisyon dili kay gibutang kini tungod kay anak kini sa mayor.

Matud pa ni Rama nga gusto niya nga moapil si Mikel sa konseho pinaagi sa pagdaog niini sa eleksyon, dili kay gitudlo lang kini alang maoy mohulip sa nabakanteng posisyon.

“I want my son to run and win. Dili kay nisud lang siya diha because of my name,” suma pa ni Rama. Dugang pa ni Rama nga gusto niya nga ang tanan nga maangkon sa iyang anak mag-agi kini sa pagpaningkamot.

“Kaming nga Rama, we always rise from our merits. Dili mi opportunists. We worked hard on our way,” suma pa ni Rama.

Si Atty. Mikel Rama mao ang kinamaguwangan nga anak ni Rama ug nakaduso na sab kini sa iyang Certificate of Candidacy alang sa 2025 midterm elections aron magpapili isip konsehal sa Dakbayan sa Sugbo. — IBM BANAT NEWS