PRO-7, Cebu City government nangandam na sa kalag-kalag

CEBU, Philippines — Gasugod na sa pagpangandam ang Police Regional Office (PRO)-7 sa pag-obserbar sa kalag-kalag sa sunod buwan.

Matud ni Police Lieutenant Colonel Gerard Ace Pelare, tigpamaba sa PRO-7 nga usa kini ka annual activity hinungdan nga napahiluna na ang security coverage mahitungod sa maong kasaulogan.

Nasayod na sila pila kabuok ang sam-ang sa Central Visayas, pila kabuok ang dagko nga sementeryo ug dugokan og daghang tawo diin aduna nay sila’y security preparation.

Si Pelare nagkanayon nga mohimo gihapon sila og reassessment aron makita kon kinahanglang mohimo og adjustment.

Gipasalig sa PRO-7 nga paniguradohon nila ang luwas ug hapsay nga pag-obserbar sa kalag-kalag karong tuiga uban sa tabang sa komunidad.

Subay niini, ang kagamhanan sa Dakbayan sa Sugbo mag-umol og action force aron masiguro ang hapsay ug malinawon nga pagsaulog sa kalag-kalag.

Kagahapon, si Cebu City Mayor Raymond Alvin Garcia nagkanayon nga ang city administrator gikatakdang mopagawas og memorandum nianang hapon nga iyang gipirmahan pag-umol og action force.Matud ni Garcia nga dili lang bahin sa pag-assign sa mga buluhaton apan lakip sa paghimo og tinuod nga aksyon pagsiguro sa kalinaw ug kaluwasan sa publiko nga mobisita diha sa mga sementeriyo.

Gibutyag ni Garcia nga ang action force usa kini ka multi-agency committee nga gilangkuban sa mga department head sa Cebu City Government, mga administrator sa sementeriyo, ug mga barangay diin nahimutang ang mga sementeriyo.

Ang maongg komitiba gilangkuban sa Cebu City Transportation Office (CCTO) alang sa trapiko, City Health Department (CHD) ug Cebu City Disaster Risk Reduction and Management Office (CCDRRMO) alang sa bisan unsang contingencies, Philippine National Police (PNP), ug uban pa.

Ug iyang imbitahon ang Metropolitan Cebu Water District (MCWD) sa paghatag og tubig sa matag sementeriyo sa siyudad, ingon man ang Visayan Electric Company (VECO) aron masiguro nga walay power interruption.