P19M nga renovation sa legislative building wala aprobahi

CEBU, Philippines — Wala una apronahi ang resolusyon sa pag-renovate sa Cebu City legislative building human gikwestiyon sa pipila ka mga sakop sa konseho ang P19 milyones nga kantidad niini diin ang labing dakong bahin maadto sa light installations.

Niadtong Septiyembre 3, 2024 ang konseho sa Dakbayan sa Sugbo nipahigayon og executive session aron ipresentar ang sugyot alang sa rehabilitasyon sa legislative building.

Sa niaging regular session, ang proponent nga si Konsehal Jerry Guardo niduso na alang sa pag-aproba niini apan atol sa diskusyon nipadayag sa iyang pagsupak si Konsehal Nestor Archival, Sr.

Matud ni Archival nga ang resolusyon dili mahitungod sa pag-renovate sa edipisyo apan pagbutang og mga running light nga alang kaniya sobra ra kaayo.             

“We’re putting lights in city hall that looks very nice. So I asked is there is an amount of the electricity cost that will be paid by the city government, I cannot find it”, matud ni Archival.

Si Archival nagkanayon nga ang P19,828,121 nga budget proposal labing menos P13 milyones ang maadto sa light installation nga alang niya, dili advantageous sa siyudad.

Dihang gipangayo usab ni Konsehal Franklyn Ong ang perspective sa maong sugyot, si Guardo nagkanayon nga na diskusyonan ug gipresentar na kini atol sa executive session.

Ug tungod niini, gibakwi ni Guardo ang naunang proposal kay giingong duha na ka managlahing Programs of Works and Estimates (POWE) ang ilang ipresentar.

Kaniadto, atol sa executive session si Lilibeth del Mar, representante sa Department of Engineering and Public Works (DEPW) nagkanayon nga ang scope of work naglakip sa repainting sa tibuok legislative building, ang pag-ilis sa aluminum cladding sa rooftop, pag-instolar sa ang mga kabinet, ug ang light installations.

Atol sa maong panaghisgot gikwestiyon usab ni Archival ang 65 ka set sa RGB lights nga nagkantidad og P100,000.

Si Del Mar nagkanayon nga atol sa proseso sa paghimo sa proposal adunay consultant gikan sa office of the acting mayor aron hisgotan kini.

Lakip sa gihangyo mao ang pagbutang niini sa mga suga aron mapanindot ang edipisyo. (BANAT NEWS)