Prayer rally para ni Jonas

CEBU, Philippines — Gibanabanang 10 mil ka mga sakop sa multi-sectoral group sa Siyudad sa Mandaue  ang nagpasiugda og prayer rally sa atubangan sa City Hall sa miaging Biyernes sa gabii Oktobre 11, 2024 alang sa pagpakita sa ilang suporta kang dismissed mayor Jonas Cortes.

Gipadayag  sa pipila ka mga namulong sa maong kalihokan nga ang pag-ampo maoy labing maayong pagahimoon  batok niining namatikdang dili makiangayong pamaagi sa politikanhong kalihokan.

Si City Administrator Jamaal James Calipayan nga maisip nga political persecution ang gibuhat kang Cortes.

Si Cortes gikasohan og grave misconduct tungod sa pag-appoint og matud dili kwalipikadong officer-in-charge ug gipahamtangan og silot nga usa ka tuig nga suspensyon.

Laing kaso sab nga grave misconduct gihapon ang gipasaka batok ni Cortes tungod sa pagtugot sa operasyon sa batching plant nga giingong walay permit, ug maoy hinungdan sa iyang pagkatangtang sa katungdanan.

Wala pa gyud matagbaw, dugang kasong kriminal ang gipasaka diha sa Ombudsman batok gihapon kang Cortes may labut gihapon sa batching plant. Ang mga nanambong sa prayer rally nagdagkot og kandila ug nagrosaryo nga gipangulohan sa usa ka pastor, pari ug ingon man gikan usab sa Muslim community sa siyudad. --  IBM BANAT NEWS