Duha napunggit og suv, gibiyaan
CEBU, Philippines — Duha ang nakalas sa nahitabong hit and run diha sa M.C Briones Street, Barangay Jagobiao sa Mandaue City niadtong Domingo sa kaadlawon apan nataho kini sa kapulisan alas singko na sa buntag.
Ang nakalas mao ang driver sa Yamaha nga motorsiklo nga adunay plate number G913BF nga gimaneho ni Richard Quia-ot, 43, residente sa Zone Kalabasa sa Barangay Paknaan ug ang back rider niini nga si Niña Logarta, 54, biyuda ug taga Latasan, Labogon, Mandaue City.
Samtang ang giingong nakabangga kanila mao ang usa ka puti nga Toyota Fortuner nga paspas kaayong mibiya sa lugar padung sa direksyon sa Consolacion human sa hitabo.
Base sa imbestigasyon, ang motor nagbiyahe padulong sa Basak Proper ug diha nisubay sa inner lane, apan pag-abot sa nahitaboan napunggit kini sa kasugat nga Fortuner.
Tungod sa kakusog sa pagbangga nalabay ang mga biktima ug nitugpa sa sementado nga dalan.
Dali unta sila nga gidala sa tambalanan apan gideklarar sila nga dead on arrival.
Matud pa ni Police Lt. Col. Mercy Villaro, tigpamaba sa Mandaue City Police Office nga nakit-an na nila ang nahimutangan sa maong sakyanan ug nailhan na nila ang tag-iya niini basi sa rehistro.
Ilaha nalang gisubay kun kinsa gyud ang nagmaneho sa SUV dihang kini nakabangga sa mga biktima. Ang pamilya sa mga namatay padayon usab nanawagan ug hustisya para sa kamatayon sa duha. (BANAT NEWS)
- Latest
