Garcia molingkod isip opisyal nga mayor karong adlawa

CEBU, Philippines — Opisyal nga molingkod si Cebu City acting mayor Raymond Alvin Garcia isip mayor sa dakbayan ini og makahurar na siya sa Department of Interior and Local Government-7 karong adlawa matud pa niini.

Kini human nga nadawat na sa DILG-7 ang kopya sa desisyon sa Ombudsman nga nagtaktak kang suspended mayor Michael Rama sa serbisyo ug perpetual disqualification to hold public office.

Sa press conference kagahapon, si Garcia miingon nga ang desisiyon sa Ombudsman nahatud na ngadto sa DILG-7 niadtong nakalabay nga Oktobre 3, 2024.

Apan tungod kay naka address kini sa suspendidong mayor iyahang gimandu sa Legal Officer paghatud niini kang Rama.

Dugang pa ni Garcia, sa susamang adlaw ang HRDO nakadawat og kopya niini tungod kay sila man ang moimplementar ug didto kini niya nasayran.  Si Garcia, nitug-an nga human sa iyang filing sa COC karong adlawa, mohurar na siya isip mayor na sa siyudad.  Hinuon dako ang pagtuo ni Garcia nga isip abogado, mangita og legal remedies si Rama.

Sa pikas bahin, ang kampo ni Rama niduso og Petition for Certiorari and Probation ngadto sa Korte Suprema  uban sa application for issuance of a status quo ante order ug urgent motion for the conduct of a special raffle aron sa pagsiguro nga di kanselahon sa Comelec ang iyang COC base sa desisiyon sa Office of the Ombudsman.

Ang maong petisyon giduso sa kampo ni Rama kagahapon, Lunes Oktobre 7, 2024. Sa 35 ka pahina sa giduso nga petition,  maoy pangaliya ni Rama nga tugotan ang iyang hangyo nga moluwat ang korte og status quo ante order aron pugngan ang Comelec sa pagkanselar sa iyang COC subay desisyon sa Ombudsman.

Gihangyo sab ni Rama nga matugotan ang special raffle nga iyang gipangayo aron madungog dayon ang iyang petisyon.

Si Rama gisilotan og dismissal from service ug ingon man perpetual disqualification from holding public office sa Ombudsman may kalabotan sa kasong nepotismo nga gisang-at batok kaniya.

Ang Comelec miingon nga ilang tahuron ang Ombudsman mao nga ilahang kanselahon ang COCs sa mga kandidatong napahamtangan og samang silot, bugtong temporary restraining order lang sa Court of Appeals o Korte Suprema maoy makapugong kanila paghimo niini. (BANAT NEWS)