OPASCOR walay eleksiyon sulod sa 20 katuig?

CEBU, Philippines — Gihimakak ni Atty. Tomas Riveral, chairman ug chief executive officer (CEO) sa Oriental Port and Allied Services Corporation (OPASCOR) nga giingong walay nahitabong eleksiyon sulod sa 20 ka tuig sa iyang paglingkod.

Matud ni Riveral nga walay kamatuoran ang pasangil batok kaniya tungod kay nahimo siya’ng chairman niadto pang tuig 2017 ug sa mga nanglabay nga panahon hangtud sa iyang panahon anaa sila’y election pinaagi sa Viva Voce Voting.

Ug pag-asumir niya niadtong tuig 2017 sa posisyon aduna sila’y daghang problema nga nasugatan sama sa congestion sa pantalan hinungdan nga ilaha kining gipangitaan og pamaagi aron masulbad ang mga problema.

Usa sa mga pamaagi mao ang pag-apply sa Cebu Port Authority sa paghimo og finger pier ug nilanat og pila ka tuig una sila gihatagan og pagtugot nga makatukod sa finger port.

Gibutyag ni Riveral nga duna untay higayon nga makahimo sila og secret balloting apan niabot ang pandemic nga gilikayan ang pagtapok-tapok ug paghuman sa pandemic nakasugat na usab sila og problema kalabot sa competition hinungdan nga ilaha na usab kining gihatagan og pagtagad tungod kay maoy ilang gitan-aw ang OPASCOR maka-survive.

Gipadayag ni Riveral nga pabor kaayo siya sa bisan unsa nga klase nga election nga ipahigayon.

Aduna na sila’y election rules nga na-draft ug tukion kini atol sa ilang tigom sa Oktubre 11, 2024 diin aduna sila’y election committee nga motuki niini ug kong unsa man gani ang resulta niini mahimo na sila nga makapahigayon og eleksiyon.  —  BDB BANAT NEWS