Dagan sa trapiko sa CSCR adunay kausaban sugod karon

CEBU, Philippines — Sugod karong adlawa, Septiyembre 18, 2024 adunay kausaban sa dagan sa trapiko diha sa Cebu South Coast Road tungod sa pagtukod sa Filinvest Il Corso Pedestrian Bridgeway.

Ang maong proyekto mokonektar sa City di Mare paingon sa IL Corso mall.

Giingong usa kini ka dakong lakang alang sa kalamboan sa pagsuporta sa gitinguha sa kagamhanan sa Dakbayan sa Sugbo aron molambo ang coastal experience sa mga Sugbuanon.

Gipahibalo sa Cebu City Transportation Office nga apektado ang mga dapit sa SRP sama sa pinakasulod sa wala nga lane partikular niini ang section nga kasikbit sa Il Corso Avenue ug El Pardo Road.

Pabilin nga ablihan ang tuo nga mga lane sa duha ka dalan nga magpaingon sa amihanang ug habagatang bahin sa Sugbo.

Matud sa CCTO nga butangan og kural ang maong trabahuon nga bahin aron mailhan kini dayon sa mga motorista.

Naglaom ang CCTO nga mosabot ang mga motorista sa pag-usab sa dagan sa trapiko gumikan kay alang usab kini sa kalamboan sa siyudad.

Sa laig bahin, gilusad karon ni Konsehal Rey Gealon ang Balik Karsada Program diin usa kini ka social justice initiative aron tawagan pagbalik ang PUV drivers nga nibiya sa kadalanan aron manimuyo sa probinsiya human adunay mga dagkong obligasyon sa ilang mga nahimong kalapasanan sa dagan sa trapiko nga adunay dakong multa sa nanglabay nga katuigan.  Ang Balik Karsada Program maoy tubag sa panawagan sa PUV operators nga wala nay laing kapaingnan ug nipadaplin sa gatusan ka PUV units, taxi, traditional, modernong jeepney ug bus tungod sa kakuwang sa mga drayber.  Matud ni Gealon nga sa kasamtangan pipila ka mga pasahero ang nangita og kapailing-ilingan sa transportasyon human na-stranded sa daplin sa kadalanan ilabi na panahon sa peak hours sa adlaw ug gabii.  BDB BANAT NEWS