Mga benepisaryo sa SIR atimanon na

CEBU, Philippines — Ang Division for the Welfare of the Urban Poor (DWUP) magmugna og task force aron matabangan ang 1,800 ka benepisaryo sa urban poor resettlement program nga Slum Improvement and Resettlement (SIR) sa Dakbayan sa Sugbo nga makakuha og seguridad sa pagpanag-iya og yuta.

Si Presidente Ferdinand E. Marcos, Sr. ang nagpasiugda sa SIR aron makahatag og kalambuan sa mga squatter areas gawas sa Metro Manila isip resettlement sites.

 Niadtong 1977, nagpadala si Marcos og letter of instruction sa National Housing Authority (NHA) aron ideklarar ang upat ka coastal areas sa dakbayan sa Sugbo nga ipaubos sa SIR program. Gani, naturnover sa NHA ngadto sa kagamhanan human napirmahan ang comprehensive memorandum of agreement niadtong 1979.

Ang mga benepisaryo nagpuyo sa mga coastal area sa Barangay Pasil, Barangay Sawang Calero, Barangay Suba, and Sitio Alaska sa Barangay Mambaling. Ang pangu sa DWUP nga si Atty. Ronald “Butch” Librando, misugyot sa gitawag nga “SIR Task Force” aron maoy mo-implementar sa City Ordinance 2521 nga makapalig-on sa mga guidelines ug polisiya nga sa SIR program.

Langkuban ang maong task force og representante gikan sa Office of the Mayor, chairperson of the Committee on Housing, usa ka opisyal gikan sa buhatan sa SIR, ug representante sa upat ka bahin sa SIR, DWUP ug Local Housing Board.

Ang pangu sa Alliance of SIR Beneficiaries Association (ASIRBA) nga si Floro Enricoso miingon nga ubang miyembro wala mopalyar sa pagbayad sa ilang mga bayrunon sa SIR sulod sa pipila ka mga katuigan apan wala ma-update sa buhatan ug wala sab ma-turnover ang titulo sa ilang mga yuta bisan og nahuman na kini og bayad. Gibasol ni Enricoso kining pag-usab usab og administrasyon ug dili maayong mga polisiya ang hinungdan nganong nag-urong ang maong programa.  

Gitug-an sab ni Enricoso napakyas sab ang maong buhatan pagtipig sa mga rekord sa gibayad sa mga benepisaryo. Base sa ASIRBA 2009 data, 43% na sa benepisyaryo sa SIR program ang naka-fully paid apan 30% lang niini ang nakadawat sa ilang titulo.

Si Librando miingon nga sukad nga giusa ang buhatan sa SIR ug DWUP niadtong 2010 pinaagi sa usa ka ordinansa duna silay tagsa-tagsa ka kaugalingong rekord.

Kun mapatuman ang Implementing Rules and Regulations (IRR) sa City Ordinance 2521, ang DWUP na ang mogunit sa SIR program. (BANAT NEWS)