P3.5 bilyong nga AIP giaprobahan sa Toledo City Development Council

CEBU, Philippines — Giapbrobahan sa Toledo City Development Council ang P3.5 bilyones nga Annual Investment Plan alang sa tuig 2025.

Atol sa gipahigayong tigom sa development council niadtong Septiyembre 12, 2024 gipresentar ni Daryl Carabio, City Planning and Development officer ang mga prorama ug proyekto sa siyudad sa sunod tuig diin nikabat ngadto sa P3,527,789,117.24 ang kinatibuk-ang pundo.

Ang maong alokasyon iapod-apod sa upat ka sector nga gilangkuban general public services, social, economic ug infrastructure development nga mga proyekto.

Base sa taho sa Toledo City Public Information Office nga gilaoman nga pinaagi sa maong pundo adunay kalamboan sa sektor sa panglawas, social welfare, kalikupan, seguriad, youth development sa siyudad.

Ang maong development council nga gipangulohan ni Mayor Marjorie Perales nihatag usab og higayon sa mga opisyal sa barangay aron mapadangat ang ilang mga yangungo ug ubang concerns.

Ang maong tigom sa council gitambongan nil ani Perales, Bise Mayor Jay Sigue ug ubang opisyales sa Dakbayan sa Toledo. Nitambong usab si Kongresista Pablo John Garcia kinsa nagkanayon nga adunay P175 milyones usab ang gigahin alang sa mga building sa eskwelahan sa CTU-Toledo campus, proyekot sa kadalanan ug P5 milyones nga medical assistance alang sa mga kabus nga makuha gikan sa Toledo City Hospital. BDB BANAT NEWS