Notadong Hitman nadakpan
CEBU, Philippines — Nabalhog sa prisuhan ang 19-anyos nga gitumbok nga notadong hitman nga giingong maoy suspek sa pito ka pagpamusil ubos sa hurisdiksyon sa Mambaling Police Station 11 sa Cebu City Police Office(CCPO) human nila kini nadakpan sa buy-bust operation sa Sitio Badjawan, Barangay Mambaling, pasado alas 11 sa gabii sa adlaw'ng Lunes, Septiyembre 2, 2024.
Ang dinakpan mao si Mark Jedrick Alvarez alyas MJ, 19, nagpuyo sa Sitio San Pedro, Barangay Duljo-Fatima ning siyudad kinsa nakuhaan og 50 gramong gituohang shabu nga nagkantidad og P340 mil.
Nakuha sab sa mga operatiba pinangulohan ni Major Efren Diaz Jr., ang usa ka kalibre. 45 nga armas nga dunay upat ka mga bala.
Si Police Colonel Antonietto Cañete, acting City Director sa CCPO miingon nga MJ maoy suspek sa pito ka kaso sa pagpamusil sa maong barangay. Nailhan na sab nila kun kinsa iyang agalon ug ang hinungdan sa pagpamusil niini may kalabotan tanan sa ilegal nga drugas.
Base sa impormasyon si alyas MJ maoy suspek sa pagpusil kang Edwin Abayan niadtong Hulyo 17, 2024 sa Sitio Micabaja, Barangay Duljo Fatima; suspek sab kini sa pagpusil kang Juvanie Destacamento, niadtong Hunyo 30, 2024 sa C. Padilla Street, Duljo Fatima; Saturnino Sericon Biscocho ug sa kaipon niini nga si Maribell Fernan Pedroza niadtong Agusto 18, 2024 sa Sitio Micabaja, Duljo Fatima; siya sab ang matud pa nagpusil kang Roldan Racal sa Sitio Lawis Alaska, Barangay Mambaling niadtong Agosto 20, 2024; pagka Agosto 22, 2024 didto sa Sitio Kahuyan, Barangay Mambaling gipusil sab sa suspek si Gilbert Salcedo Gelbolingo ug sa samang adlaw gipusil sab niya si Julieta Estrera sa Sitio Badjawan, Barangay Mambaling. Gitudlo sab nga suspek si MJ sa pagpusil kang Dexter Cuizon diha sa Sitio San Juan Seawall, Barangay Mambaling niadtong Agusto 30, 2024.
Siya sab ang suspek sa pagpusil sa kanhi PBA Player nga si Eliud Poligrates sa dihang menor de edad pa ang suspek tungod kay wala mohatag og kwarta ang basketbolista nga iyang gipangayoan.
"As far as the group, neutralized na sila. But we still cannot discredit basin naa pay other members, of course with the help of the public we can assure to to you they will not stand long, we will arrest them immediately," sigon ni Cañete. -- IBM BANAT NEWS
- Latest
