Usa patay, laing usa angol sa bangga sa motorsiklo

CEBU, Philippines — Usa patay samtang laing usa ang angol human nagbangga ang duha ka motorsiklo diha sa Purok Magimbuhaton, Barangay Lambusan, Lungsod sa San Remigio niadtong Domingo sa gabii.

Ang namatay mao si Teodoro Albaran Tagalog, residente sa Luyong Baybay, Barangay Tacup, Lungsod sa Remigio ug giingong wala kini lisensiya nga nagmaneho sa motorsiklo samtang ang naangol mao si Leo Dane Raña Ugay, 23-anyos, nagpuyo sa Baragay Casate, Lungsod sa Ubay, Probinsiya sa Bohol.

Base sa taho sa San Remigio Police Station nga si Ugay gabiyahe gikan sa Arapal, Dakbayan sa Bogo paingon sa Barangay Lambusan Proper samtang si Tagalog nagbiyahe sa opposite direction.

Apan pag-abot ni Tagalog sa kurbadahon nga bahin sa lugar giingong na-overshoot kini sa pikas lane ug naigo niini ang motorsiklo nga gimaneho ni Ugay kinsa nisuway pa og likay.

Ang duha ka drayber gidala sa Cebu Provincial Hospital sa Dakbayan sa Bogo apan si Tagalog gideklara kini nga patay na nga naabot sa tambalanan.

Ang asawa ug anak ni Tagalog nibutyag nga nakainom ang naulahi dihang nagmaneho sa motorsiklo diin padong unta kini sa iyahang igsuon nagdala og pagkaon. (BANAT NEWS)