Managkapuyo nadakpan
CEBU, Philippines — Wala nakaipsot sa mga tinugyanan sa balaod ang mag live-in partner nga matod pa nalambigit sa illegal nga drugas human sila nasikop sa buy-bust operation sa Carbon Police Station 5 sa Cebu City Police Office(CCPO) sa managlahi nga Sitio sa Barangay Ermita, siyudad sa Sugbo. Ala-una sa kaadlawon kagahapon, Lunes, Septiyembre 2, 2024 unang nadakpan sa Sitio Pig Vendor si Rodel Cabinte alyas Rodel, 27, residente sa Sitio Ermita Proper ning siyudad ug nakuhaan kini og pinakiteng gituohang shabu.
Sa follow up operation nadakpan sab ang kaipon ni Cabinte nga si Janine Palermo Milagrosa alyas Janine, 32, nga gikonsiderar nga high value individual ug kini nakuhaan sab og 15 gramo nga gituohang shabu nga nagkantidad og P102,000.
Gironda sab ang drug den dungan sa gihimong buy-bust operation sa mga tinugyanan sa PDEA-7 uban sa kapulisan sa Labangon Police Station 10 diha sa Sitio Andang, Barangay Labangon sa milabay nga adlaw.
Ang nasikop naila nga sila si Jaymar Rosal, 29, ang gitumbok nga tigmintinar sa drug den lakip usab ang mga parokyano niini nga sila si Jerson Plantar, 34 ug Reymous Vergara, 24, graphic artist.
Nasakmit gikan kanila ang 13 ka putos nga gituohang shabu nga mobalor og dul-an P109 mil, buy-bust money, P140 nga gituohang halin ug kagamitan sa pagsuyop og ginadili nga drugas.
Si Rosal ug Plantar ang nadakpan na niadtong Hunyo 2017 tungod sa kaso sa drugas pero nakapiyansa.
Gikan sa Septyembre 1 hangtod sa petsa 2, 2024 ang PRO-7 nakasakmit og 458.85 grams sa gituohang shabu nga nagkantidad og P3.1 million ug 35 ka mga drug personalities ang nadakpan (BANAT NEWS)
- Latest
