DepEd nagkigtambayayong sa iamtheCODE

CEBU, Philippines — Nakigtambayayong ang Department of Education (DepEd) sa “iamtheCODE” pinaagi sa memorandum of understanding (MOU) aron maghatag og libreng coding ug digital skills nga mga kurso sa mga batan-ong kababayen-an sa nasud ug palig-onon ang Science, Technology, Engineering, Arts, Mathematics and Design (STEAMED) nga inisyatibo sa ahensiya.

Mapasalamaton si DepEd Secretary Sonny Angara kang Lady Mariéme Jamme nga maoy nagtukod sa iamtheCODE tungod sa dedikasyon niini nga mahatagan og gahum ang mga batan-ong babaye nga mga estudyante pinaagi sa ilang plataporma.

Matud ni Angara ang presensiya ni Jamme nagpakita sa ilang parehong interest sa pagpaapil sa daghang mga Filipino nga batan-ong kababayen-an sa programa alang sa mas maayong kaugmaon alang sa ilang kaugalingon ug sa ilang pamilya.

Ang iamtheCODE mao ang una nga pangkalibutanon nga kalihokan nga gipangulohan sa Africa nga nagtumong sa paghatag og gahum sa usa ka milyon nga batan-ong babaye aron mahimong mga coder ug mamugnaon nga mga tigsulbad sa problema sa 2030.

Matud ni Jamme nga nitabang sila sa tanang tawo sa kalibutan ug ang ilang kahibalo ug kahanas nga gipangulohan sa Africa makabenepisyo usab sa komunidad sa mga Filipino.

Pinaagi niini, ang mga eskwelahan sa DepEd hatagan sa iamtheCODE og access sa 60,000 ka libreng kurso sulod sa 12 ka semana nga blended curriculum nga gilangkuban sa STEAMED workshops, apprenticeship programmes, ug repository sa open-source online courses. Ang DepEd maoy magpakaylap sa mga impormasyon kabahin sa kurso samtang ang iamtheCODE mosuporta sa pilot nga implementasyon sa programa sa piniling boluntaryong mga eskwelahan gikan sa grade 7 hangtud sa junior high school sa lain-laing rehiyon. — /BDB (BANAT NEWS)