Front ra diay? - Chan

CEBU, Philippines — Wala mabantayi sa syudad sa Lapu-Lapu City ang na-raid nga hotel tungod kay kun permits ang hisgutan legal man ang ilang pag-apply sa mga negosyo sa sud.

“Kana siyang bahina, di man gud ta ka monitor because in their applications for their business permits, they have compliance of their permits,” butyag pa ni Mayor Junard “Ahong” Chan sa The Freeman/Banat News.

“They have hotels, restaurants, KTVs, they have groceries, so they have complied it, nihatag gyud ang city but we didn’t know that they operating illegal POGO,” dugang ni Chan.

Andam matud pa siyang kanselahon ang tanang permits sa maong hotel kung mogawas sa imbestigasyon nga POGO kadtong gironda.

“Kay murag mahog man gud nga i-front lang nila ang ilang negosyo niya ilegal diay ang gihimo,” ingon ni Chan.

Maghuwat ang syudad na mahuman ang imbestigasyon ug imbentaryo na gipahigayon sa Department of Justice (DOJ) ug Presidential Anti-Organized Crime Commission (PAOCC).

Giklaro sab ni Chan ang pamahayag niyang walay POGO sa siyudad tungod kay ang legal nga POGO nga nag-operate nanirado na.

“I just want to clarify, that there is one area in Lapu-Lapu which was rented in Basak in City Time Square, na gi rentahan og POGO, for POGO purposes but syempre at that the time before the announcement of the President gi allow man sa PAGCOR ang legal POGOs so nag-apply sila,” ingon ni Chan.

Gimandoan karon ni Chan ang kapolisan nga magpahigayon og profiling ug close monitoring sa mga langyaw sa syudad para masusi ang ilang mga lakaw ug pangbuhaton sa syudad.

Human trafficking

Moabot 169 ka langyaw ang naluwas gikan sa ilegal nga Philippine Offshore Gaming Operator (POGO) hub nga nahimutang sa Tourist Garden Hotel sa Barangay Agus, Lapu-Lapu City, Cebu, niadtong Agosto 31.

Dunay pagduda ang raiding team nga aduna pay laing sekretong POGO operations dinhi sa Sugbu.

Ang National Bureau of Investigation (NBI)-7 mibutyag nga sa 169 ka mga langyaw, ang 93 niini mga Chinese, 69 ka mga Indonesians, usa ka Malaysian, ug unom gikan sa Myanmar.

Samtang, gibana-bana nga pito ka mga Pilipino nga naapil sa POGO ang nadakpan. Si NBI-7 Director Atty. Renan Augustus Oliva miingon nga ang pito ka mga Pilipino maoy mga administrators sa maong hub pasakaan og kasong paglapas sa Republic Act 9208 o mas nailhan nga Anti-Trafficking in Persons Act of 2003 karong adlawa.

“Ang kasohan namo kay ang unsa ang naa sa documents nga maka-link sa kani na activity kay document based man ta,”matud ni Oliva.

Human masang-at ang kaso, mag-apply usab sila og cyber warrant alang sa mga computer ug uban pang gadgets nga nakuha sa raid.

Nakumpiska sa operasyon ang mga computers, mobile phones, ug uban pang electronic devices nga gigamit alang sa "love scams" ug “cryptocurrency fraud” matud pa sa NBI.

Sertipikasyon

Sa laing bahin, si Police Lieutenant Colonel Gerard Ace Pelare, tigpamaba sa Police Regional Office-7 (PRO-7) nga

Giklaro sab niya nga sa mga sertipikasyon nga gisumiter sa mga police stations wala’y nag-ingon nga duna silay namatikdang POGO ubos sa ilang hurisdiksyon.

“Like this one (in Lapu-Lapu) nga naa jud sa secluded area. So wala may naka certain jud nga nakaingon nga wala juy POGO sa certain na area. Ang mga certifications nga gi submit, naga ingon lang nga as of that period wala pay indicator so wala pa juy namonitor ang atong government,” pagpasabot pang Pelare.

Underground

Si Police Lt. Col. Christian Torres, tigpamaba sa Lapu-Lapu Police Office (LLCPO) miangkon nga lisod para nila pag-detect sa POGO kun dunay mga front nga establisamento sama niining hotel sa Agus. Matud niya, posibleng nag-underground operation sila human wala tugoti sa siyudad.

Duna pay lain

Sa pikas bahin, dako ang pagtoo sa tigpamaba sa Presidential Anti-Organized Crime Commission (PAOCC) nga si Winston Casio nga naa pay laing mga operasyon nga sama niini dinhi sa Sugbu. — Rowena D. Capistrano/IBM (BANAT NEWS)