Mayor sa selda, bata-bata nadakpan sa drug bust

CEBU, Philippines — Nadakpan sa buy-bust operation sa Labangon Police Station 10 Cebu City Police Office(CCPO) ang kanhi mayor sa selda diha sa A. Lopez Street, Barangay Labangon, dakbayan sa Sugbo, Huwebes sa alas 9 sa gabie.

Ang dinakpan mao si Reynaldo Repaso Cabatino, alyas Ekot, 54, residente sa Sitio Micabaja, Barangay Duljo Fatima, dakbayan sa Sugbo. Nakuhaan ang suspetsado og green pouch nga dunay sulod pito ka pakite sa gituohang shabu nga motimbang og 20.2 gramos ug nagkantidad og P137,000.

Nagkanayon si Police Major Eraño Regidor, Hepe sa Labangon Police Station nga usa ka ex-convict ang suspetsado tungod sa kasong kalambigitan sa illegal nga drugas.

Samtang didto pa kini sa prisohan, nahimo kining mayor sa selda sa Cebu City Jail Male Dormitory.  Dihang nakagawas na sa prisohan gikatahong nipadayon gihapon kini sa pagpamaligya og illegal nga drugas hinungdan nga gilusad ang buy-bust operation batok kaniya.

Samtang nadakpan sab ang bata-bata niini sa buwag nga operasyon diha sa Sitio La Tresas, Barangay Labangon, alas-11 sa gabii sa samang adlaw human dunay nisumbong sa mga polis nga kini armado.

Ang dinakpan mao si Gerry John Sarsona Caballero, 30 anyos, residente sa Gochan Street, Barangay Mambaling ning siyudad ug usa ka street level drug pusher sumala pa sa kapolisan.

Nakuhaan ang suspetsado og usa ka kalibre .38 nga revolver nga gisuksok sa hawak nga dunay usa ka bala, apil na ang putos sa gituohang shabu sa bulsa sa suspetsado.

Nagkanayon si Police Major Eraño Regidor, hepe sa Labangon Police Station nga si Caballero bata-bata ni Cabatino ug mobaligya sab siya og illegal nga drugas.

Ang suspetsado miangkon sa kapolisan nga ang armas nga nakuha sa iyaha gipanag-iya ni Cabatino ug igo ra siya magdala-dala niini.

 Sa laing operasyon, nadakpan ang usa ka kargador sa Pasil Fish Port sa Barangay Pasil sa Siyudad sa Sugbo atol sa buy bust operation sa kapolisan sa Presinto 3 sa Lapu-Lapu City Police Office (LCPO) alas pasado ang takna sa miaging gabii. Si Police Lieutenant Colonel Christian, tigpamaba sa LCPO miingon nga ang buy bust operation nga gipahigayon sa Purok 5 Star sa Barangay Babag base sa impormasyon nga ilang nadawat nga namaligya kini og ilegal nga drugas sa maong lugar.

Nasakmit gikan sa dinakpan ang lima ka gramo nga gituohang shabu nga nagkantidad og P34 mil, marked money ug mga drug paraphernalia. -- Romeo T. Limpangog/IBM BANAT NEWS