Pasigarbo 2024 mi-level up

CEBU, Philippines — Gihulagway ni Gob. Gwendolyn Garcia nga mi-level up gyud ang pasundayag sa mga contingents sa Pasigarbo sa Sugbu ning tuiga.

Sa bag-ohay nga natapos nga kompetisyon niadtong adlaw nga Domingo, Agosto 25, 2024, ang Dagitab Festival sa Siyudad sa Naga maoy karon grand winner sa ritual showdown sa bag-o pa lang nahuman nga Pasigarbo sa Sugbo 2024.

Ang "festival of lights" sa maong dakbayan nga gipakita pinaagi sa selebrasyon sa Pasko nga konsepto maoy nakakuha og dakong score gikan sa mga bag-ong judges sa Pasigarbo. Nagsunod sa Naga, ang Sugat Kabanhawan sa lungsod sa Minglanilla, nga maoy grand winner sa ritual showdown sa niaging tuig.

Ikatulo ang Garbo sa Lapu-Lapu sa Lapu-Lapu City; ika-upat ang Kabkaban Festival sa Carcar City dayon nagsunod ang Isda Festival sa Madridejos; Panagtagbo Festival sa  Mandaue City; Tuba Festival sa Borbon; Sikoy-Sikoy Festival sa San Fernando; dayon nag-tabla sa 9th place ang  Rosquillos Festival sa Liloan ug Hinulawan Festival sa Toledo City; 10th place ang La Torta Festival sa Argao; sunod ang Kagasangan Festival sa Moalboal;  Sarok Festival of Consolacion; table pud sa ika-13 ang Katunggan Festival sa Tudela ug Que’ Alegre Festival sa Alegria; ika-14 ang Banig Festival sa Badian; ug tabla usab ang Bonga Festival sa Sibonga ug Tubod Festival sa Tuburan.

Matud ni Gobernador Gwendolyn Garcia ang mga nag-tabla sa iskor makadawat og parehong premyo gikan sa Kapitolyo.

Samtang pag-abot sa street dancing nga kompetisyon, daog ang Kabkaban Festival sa Carcar City, sunod ang Rosquillos Festival sa Liloan; ika-tulo ang  Panumod Festival sa Barili; ika-upat ang Sarok Festival sa Consolacion ug ika-lima ang Panagbagat Festival sa Poro.

Napili nga Best Festival Jingle ang Sarok Festival sa Consolacion. Best Festival Costume pud ang Isda Festival sa Madridejos. Best in Carroza ang  Palawod Festival sa Bantayan.

Best in Decorated Float ang Sarok Festival dayon 2nd place ang Panagsogod Festival sa Sogod; ika-tulo ang Sinulog Festival sa Carmen; ika-upat ang Palawod Festival sa Bantayan, ug ika-lima ang Lingaw Sadya Festival sa Balamban.

Ang Best Mayor's Introduction Video nakuha pud ni Madridejos Mayor Romeo Villaceran. Ikaduha si Lapu-Lapu City Mayor Junard Chan, ikatulo si Santander Mayor Marites Monic Buscato, ikaupat si Samboan Mayor Emerito Calderon ug ikalima si Alegria Mayor Gilberto Magallon. Sa Festival Queen, ang pambato sa Carcar nga si  Marie Yasmin Fabian maoy Pasigarbo sa Sugbo Festival Queen 2024.  1st Runner-up si Sofi Maxim Margareta Grenmo sa Lapu-Lapu City; 2nd Runner-up si Kyra Rei Hopkins sa Minglanilla;  3rd Runner-up si Britanny Noynay Verleysen sa Argao ug 4th Runner-up si  Qatari Semblante sa Liloan.

Miss Photogenic mao si Mary Love Lopez sa Panagbagat Festival of Poro  samtang ang Best Festival Queen Costume (nga i-award sa designer) nakuha pud ni  Eden Grace Mendez  sa lungsod sa Carmen.

Atol sa performance sa mga contingents, ang Hinulawan Festival sa Toledo ang wala makasunod sa gi-require nga usa ka minuto nga pagsulod sa stage, hinungdan nga si gobernador Gwendolyn Garcia mihimo og katin-awan niini ug nagkanayon adunay "deduction" o pagminus sa score sa Toledo. Ang nahitabo, wala pa makahingpit og "exit" ang gisundan nga contingent sa Toledo, nisulod na dayon ang ilang grupo sa stage bisan og ang "rule" makasulod ra sila kun magsugod na pud ang introduction video sa ilang mayor.

Apan human sa pagpasundayag sa tanang contingents ug pipila ka minuto sa wala pa gianunsyo ang mga mananaog si Garcia nagkanayon nga na desisyonan sa mga judges nga walay gikuha nga puntos sa Hinulawan contingent.

"So ang scoring as far as Toledo was concerned, kung unsa may iyang nakuha nga score, wala toy penalty for the late entry," matud ni Garcia.

Taliwala sa gamay nga kakulian, nalipay si Garcia sa resulta sa peformance sa mga contingents nga matod pa tanan "mi-level up".

"It didn't matter if gikan ka sa mainland nato or gikan ka sa isla, ang level of performance, up gyud tanan," matud ni Garcia kinsa midugang, "mao nay nakanindot kaayo, they all answer my challenge to level up. And that's the only way that we can push for Cebu for greater heights"

"Tonight the LGUs gave honor to the Cebuanos. Gipasidunggan nila ang pagka Sugboanon nato," sumala sa gobernador.

Si acting Mayor Raymond Alvin Garcia sa Cebu City nihulagway nga malampuson kaayo ang Pasigarbo sa Sugbo.

Samtang si acting Cebu City Police Office City Director Antonietto Cañete nihulagway nga malampuson ug malinawon nga nahuman ang kalihokan nga walay nabiktima og bisan unsang krimen nga nakabalda sa kalihokan.  Nagkanayon si Police Lieutenant Colonel Janette Rafter, Deputy City Director for Administration sa CCPO sayo pa lang sa kaadlawon gi-deploy ang mga polis.

Gibana-bana nga anaa sa 17,000 ngadto sa 18,000 ka mga tawo      ang nitan-aw sa sulod sa CCSC, wala pay labot ang naa sa gawas nga wala na kasulod gumikan puno na sa sulod.

Tungod sa malampusong preparasyon sa CCPO gidayeg ni PRO-7 Regional Director Brigadier General Anthony Aberin ang mga sakop. — Rowena Capistrano ug Decemay P. Padilla (BANAT NEWS)