Hepe sa kapolisan sa Talisay gihimoag pekeng FB account
CEBU, Philippines — Nikatap karon ang peke nga account sa Facebook sa hepe sa kapolisan sa Dakbayan sa Talisay. Dali nga gi-post sa Facebook Page sa kapolisan sa Talisay ang pahimangno sa publiko kay basin og gamiton kini sa pagpangilad.
Si Police Lt. Col. Epream Paguyod aduna lang kini usa ka account nga “Epream G Paguyod.” Apan ang peke nga account small letter “p” sa iyang apelyido nga Paguyod.
Nagpatabang ang kapolisan sa katawhan nga ma-report ang mao nga account aron malikayan ang pagpang-scam ug uban pa nga matang sa ilegal nga kalihukan gamit ang pangalan sa maong opisyal.
Si Paguyod maoy ikatulong opisyal sa Talisay nga gihimoan og peke nga account.
Una niini, si Konsehal Eduardo “Digul” Gullas III ang gihimoan sab og peke nga account sa Facebook nga nakamugna og kalibog sa Talisaynon atol sa iyang pakulo nga paghatag og papremyo.
Samtang gi hack ang account ni bise mayor Richard Francis “Choy” Aznar. Gi-report na nila kini apan hangtud karon wala pa gyud kini marekober. (BANAT NEWS)
- Latest
