Sapatero sikop sa buy-bust

CEBU, Philippines — Usa ka manahiay og sapatos nga giingong ni-sideline og paghatud og shabu ang nasikop sa buy-bust operation sa PNP Drug Enforcement Group Special Operation Unit-7 kagahapon sa kadlawon diha sa Sitio Tambis, Barangay Sambag 2, Dakbayan sa Sugbo.

Ang suspetsado mao si Marcos Igot Ybañez, 52-anyos, residente sa Basak Eskwelahan, Barangay Basak, Siyudad sa Lapu-Lapu.

Ybañez giingong nangangkon nga niadtong bulan sa Marso niining tuiga siya nagsugod sa maong ilegal nga kalihokan ug giangkon usab niini nga tiggamitan siya og ilegal nga drugas.

Matud sa otoridad nga duha ka semana nilang na-monitor ang ilegal nga kalihokan sa suspetsado ug gikatahong maka-dispose kini og 50 gramos nga shabu matag semana ug kasagaran sa iyang operasyon ang Barangay Duljo Fatima, A. Lopez ug Barangay Sambag 2.

Nakompiska sa kapolisan gikan sa suspetsado ang duha ka dagkong putos sa shabu nga nitimbang og tag 25 gramos ug usa ka medium nga pakete nga nitimbang og lima ka gramo nga nibalor tanan ngadto sa P374,000 ug  buybust  money.

Kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drug Act og 2002”.

Sa laing bahin, nadakpan sa Philippine Drug Enforcement Agency (PDEA) Bohol Provincial Office ug Bohol Maritime Police, Bohol Police Provincial Intelligence Unit/Provincial Drug Enforcement Unit ug Tagbilaran City Police Station ang usa ka high value individual dihang nihimo sila og buy-bust operation ngadto sa P-7, Barangay Bool, Tagbilaran City, Probinsiya sa Bohol sa niaginAg adlaw.

Nasikop sa maong operasyon si Alvin Rex, 23-anyos, subject sa operasyon, walay trabaho ug nagpuyo sa Lungsod sa Baclayon sa maong probinsiya.

Nasakmit gikan sa suspetsado 15 ka putos nga shabu nga nitimbang tanan ngadto sa 75 grams ug gibana-bana nga nagkantidad og P510,000, buy-bust money, cellphone ug ubang non-drug evidence.

Ang suspetsado giingong maka-dispose og usa ka kilo nga drugas kada buwan ug gikatakdang pasakaan usab og kasong kalapasan sa Section 5 ug 11 sa Akta Republika 9165. (BANAT NEWS)