Sapa sa dalan Sikatuna nigamay tungod sa mga estraktura—Comar

CEBU, Philippines — Gitinguha ni sa pangulo sa PROBE ug river commander Aderson Comar nga mabawi sa siyudad sa labing daling panahon ang orihinal nga gilapdon sa taytayan nga gitukod niadto pang tuig 1920 diha sa Sikatuna Street nga sa iyang pagtuo, adunay sapa kaniadto nga karon nahimo nalang usa ka kanal.

Dako ang pagtuo ni Comar nga tungod kay natabunan ug nahimo nalang nga kanal ang sapa, anha na hinuon modagayday ang tubig baha sa dalan Bonifacio ug Sikatuna nga pirmeng lunopan kun kusog ang uwan.

Sa gihimong survey sa Task Force Gubat sa Baha, lima ka mga balay patigayon ug usa ka residential structure ang nakaali na orihinal nga sapa.

Matud pang Comar, aning lima, ang usa nagmagahi gyud pagdawat sa notisya, gani gitabunan sa tagiya og pintal ang gipintal nga marka sa task force nga ilhanan sa 3-meter easement zone.

“Mao ng di na mawagtang ng baha diha sa Bonifacio kay kana siya diha, nay tulay diha 1920 pa. Karon ang mga establishments especially kanang MM Industries and ilahang riprap, nilapas sa poste sa tulay,” matud pang Comar.

“Naay tulo ka poste anang tulay..pirmerong poste, nilapas sila, and tunga nga poste mao ng nay tatak na 1920...Dagko nga establishment ang nakalapas,” dugang pa niya. Ang tubig gikan sa Jakosalem anha modagan sa Sikatuna kun kusog ang pagbunok sa uwan.

“Sauna river man gyud na kay nganong naa may tulay…Unya mi-kipot na..Unya kUn ari kas Ibarra corner Bonifacio, nay tulay diha nga ang tunga nga poste nabahin ang isig kadaplin gitukurag building..Nigamay ang sapa, maong nahimo na siyang kanal…mao ning parehas sa giingong Mayor Mike sauna nga ang suba nahimo ng kanal, ang nabilin one meter na lang,” matud pang Comar dungan sa pagbutyag nga ang mga karaang namuyo sa lugar miingon nga lapad gyud kadto nga sapa kaniadto pa.

Sumala pang Comar, mao ni ang hinungdan nganong dili gyud masulbad ang problema sab aha sa lugar. Gikatakdang moisyu pagusab og notisya si Comar aning mga establisamento aron pagpahibalo kanila nga nakalapas na sila sa water code sa nasud.

 Karong sunod semana sugdan na ang clearing operation sa lugar. Malaumon si Comar nga tabangan sila sa ubang hingtungdang ahensiya pagbuhat sa ilang trabaho batok aning mga malapason sa balaod sama sa OBO ug sa Assessor's Office. (BANAT NEWS)