Sitg duna nay poi sa pagpanulis

CEBU, Philippines — Aduna nay persons of interest ang Special Investigation Task Group (SITG) nga giumol ug maoy nakatutok sa imbestigasyon sa pagtulis sa duha ka jewelry stores sa Labucay Building, F. Calderon Street, Barangay Ermita, siyudad sa Sugbo niadtong Huwebes sa buntag, Agosto 8, 2024.

Apan wala una gibutyag kung pila ka buok ang persons of interest apan base sa unang gibutyag sa kapulisan dili momenus sa unom ngadto sa walo ka tawo ang naghimo sa pagpanulis.

Nagkanayon si Police Lieutenant Colonel Maria Theresa Macatangay, Deputy City Director for Operations ug maoy spokesperson sa SITG nga duna na sila'y mga nakuhang leads nga makatabang sa ilang imbestigasyon.

Gilangkuban ang SITG nila ni Police Cebu City Acting Director Colonel Antonietto Cañete kinsa maoy SITG Commander; Police Colonel Noel Flores, Deputy Regional Director for Operations sa Police Regional Office-7 ug mao ang SITG Supervisor; Police Colonel Gervacio Balmaceda Jr., Chief, Regional Intelligence Division-7 ug Assistant Supervisor; Police Colonel Russel Maca, Chief, Regional Intelligence Unit-7; Police Colonel Ireneo Dalogdog, pangulo sa Regional Investigation and Detective Management Division-7 ug ang ubang national support unit sa PNP sama sa Criminal Investigation and Detection Group-7 ug ang PNP Forensic Unit 7 lakip na ang Regional Anti-Cyber Crime Unit ug uban pa.

Sa pangutana kun duna na bay pasakaan og kaso karong Lunes sunod semana si Macatangay miingon nga wala pay pasakaan og kaso tungod kay bisan og nakakuha na sila og mga leads apan kinahanglan pa nila palig-onon ang mga ebidensya nga nakuha aron hugot ang ilang kaso.

"Not yet. Investigation is ongoing. We have obtained valuable leads, but we still need to strengthen gathered evidence to have a tight case," ni Macatangay pa.

Nagpadayon pa ang kapolisan sa ilang manhunt operations diin usa sa ilang gipaningkamutan nga dili makagawas sa Sugbo ang mga tulisan hinungdan nga tanang entry ug exit points gibantayan.

Si PRO-7 Regional Director Brigadier General Anthony Aberin hugot nga nag-monitor sa imbestigasyon sa maong pagpanulis.

Di Taga Sugbu

Sa pikas bahin, si acting Mayor Raymond Alvin Garcia sa Dakbayan sa Sugbo nagtuo nga ang mga tulisan dili taga siyudad sa Sugbo ug nakagawas na sila dinhi sa siyudad.

Sumala pa sa mayor dali ra kaayo ang pagbiya padung sa gawas sa siyudad tungod kay pipila lang ka lakang gikan sa utlana maabot na dayon sa laing dakbayan.

Dako sab ang iyang pagtuo nga ang nanulis sa Oro Sugbu niadtong miaging tuig posibleng konektado ra ug posibleng usa kini ka dakong sindikato.

Dugang pa ni Garcia nga alarming ang maong panghitabo ilabi na udtong tutok kini nahitabo sa siyudad, hinungdan maoy iyang panawagan sa mga opisyal sa PNP nga pahugtan pa ang intelligence gathering.

Tungod sa iyang nakita nga adunay pagkuwang ang mga otoridad hinungdan nalutsan sa mga tulisan nga gituohan nga gikan sa laing lugar.

Giawhag usab ni Garcia ang katawhan nga magmabinantayon kanunay diin kung aduna silay mabantayan nga kadudahan og lihok nga mga tawo sa ilang dapit itaho gilayon kini sa kapulisan.(BANAT NEWS)