Kapitolyo mokuha og mga bag-ong judges sa pasigarbo

CEBU, Philippines — Mokuha og mga bag-ong judges ang Probinsya sa Sugbo nga maoy mopili og mananaog sa ritual showdown sa Pasigarbo sa Sugbo 2024.

Matud ni Cebu Governor Gwendolyn Garcia nga bag-o ang tanang 10 ka mga judges sa maong festival nga apilan sa 51 ka mga lungsod ug siyudad sa probinsya sa Sugbo.

“Para nako it would be more fair that, nga ang atong panel of judges karon nato … sa ritual showdown will be totally new, bag-o gyud nga set that come from the arts, from television, from movies, from theatre, film and of course dance but not necessarily molimit lang ta’g ballet, folk dance…” suma pa sa gobernadora.

Sa nasayran si Garcia nakigtigum sa mga mayor ug tourism officers didto sa Kapitolyo.

Ang uban nga gikuha nga judges mikompirmar na sa Kapitolyo samtang ang uban gikonktak pa sa Probinsya.

Matud ni Garcia nga ang pag-usab sa mga judges karon tuiga, gumikan ra usab sa mga request gikan sa pipila ka LGU.

Kasagaran sa mga judges sa Pasigarbo sa Sugbo, nahimo na nga judge niadto pang 2008 ug nabantayan usab ni Garcia nga sa iyang pagtambong sa mga festival sa matag lungsod, susama ra gihapon nga mga judge ang gikuha aron mopili sa mga mananaog.

Nagkanayon si Garcia nga aron adunay bag-ong perspective sa pagpili sa modaog sa Pasigarbo, mas maayo nga bag-o pud ang kuhaon, ilabina nga ang maong festival mi-evolve na karon.

Subay niini mihagit si Garcia sa mga mayor nga mas maayo nga mo “level up” sa mga performance niini.

Ang Pasigarbo sa Sugbo himoon karong Agosto 25 diin ipahigayon kini balik diha sa Cebu City Sports Center (CCSC). (BANAT NEWS)