Hustisya para kang Charina

CEBU, Philippines — Unsay sala sa akong anak? Kini maoy pangutana ni Letecia Relativo ngadto sa nipasipala sa iyang anak nga si Charina Relativo kinsa napalgang wala nay sapot, nasunog ang buhok ug patay na sa suds a giabangan niining lawak.

Si Charina,27-anyos nga saleslady napalgang patay niadtong Biyernes, Agosto 2, 2024 sa Sitio Laguna, Barangay Bulacao, siyudad sa Sugbo.

Usa ka alyas Darren nga giingong sud nga higala sa kapuyo ni Charina ang gikustodiya sa kapolisan may kalabutan sa maong hitabo.

Atol ning pagsuwat sa balita, ang maong lalaki wala pa giisip nga suspek sa maong krimen, apan karong adlawa nagpatawag ang Cebu City Police Office(CCPO) og press conference mahitungod niini. Ang inahan sa namatay mitug-an sa Banat News nga kun pananglitan magkita sila sa nipasipala sa iyang anak, iyaha gyud kining pangutan-on kun unsay sala ni Charina nganong gibuhat niya kini nga buotan man unta ang iyang anak.

Wala sab makapugong sa iyang tumang kasuko si Letecia tungod sa nahitabo sa anak.

"Kalami kaha niya niyang dabu-dabohan naa pa siya sa akong atubangan, pwerteng paeta," sigon ni Letecia. Si Charina ikaduha sa tulo ka mga anak ni Letecia Relativo.

"Grabe ka supportive na nga anaka, pagkabuotan nga anak. Dili gyud (dili madawat), sakit kaayo sa ilang gibuhat sa akong anak. Ang plano gyud niya number 1 unta nahumam naman og eskwela iyahang manghod kining balay namo. Patiwas gyud niya kay gusto siya naa daw mi CR sa sulod, naa siya'y kaugalingong kwarto kay maminyo na siya dili siya maglain, moipon ra kuno siya namo, mao gyud nay iyahang plano," ni Letecia pa.

Nanghinaot ang pamilyang Relative nga mahatag kanila ang hustisya sa labing dali nga panahon. Gusto nila nga manubag sa balaod ang mga hingtungdan.

Karong Agosto 11 gikatakda nga ilubong si Charina. (BANAT NEWS)